(کابل ټکی کام، ۱۳۹۸، وری ۹)
په وروستيو کې د بهرنيو او دولتي ځواکونو په ګډو عملیاتو کې د ملکي تلفاتو لړۍ تونده شوې چې د ملګرو ملتونو، یوناما او ځينو بشري بنسټونو تر څنګ طالبانو هم په بار بار په افغانستان کې په ميشتو بهرنيانو او بشري بنسټونو غږ کړی چې په عملياتو کې د ملکي خلکو مرګ ژوبلې مخنیوي په اړه جدي اقدامات وکړي خو لا هم دغه لړۍ روانه ده.
د ګډو ځواکونو په عملياتو کې په تيرو څو مياشتو کې نږدې هره شپه ملکي ميشت ځايونه، کلي، مسجدونه، کورونه، مدرسې، او کلينيکونه په نښه کېږي چې ډيری قربانيان يې ملکي وګړي دي.
څو ورځې مخکې چارواکو ادعا وکړه چې طالبان د خلکو له کورونو پر عسکرو بريدونه کوي او په ځوابي بريدونو کې ملکي خلکو ته زیان اوړي خو طالبانو د چارواکو دغه ادعا رد کړې ده.
طالبانو د ورځې خبره تر عنوان لاندې چې د دوی رسمي دريځ څرګندوي ويلي ” دښمن په خپلو حملو کي دملکي تلفاتو څخه چورلټ انکار کوي،که څه هم خلک هر څومره چیغي ووهي چي راشئ وګورئ ټول زیان ولسي خلګو ته رسیدلی،خو که کومه پیښه ډيره ښکاره او انکار ناپذیره شي نو بیا پر مجاهدینو تور لګوي چي د ملکي خلګو په کورونو کي پټیږي او یاد خلکو له منځه پر دوی بریدونه کوي،که دا دعوه یې هم خلک په کره لاسوندونو رد کړي،نو بیا په یوه جمله کي په پیښه د خواشینۍ ښودلو او یامعافي غوښتلو ځان له دې ستر جرم څخه خلاصوي.”
طالبان وايي، د کابل رژيم او یرغلګر په ښکاره د بشردوستۍ نارې وهي خو په عمل کې يې بشر دښمنۍ ته لاس اچولی زياتوي ” شپه او ورځ ددوی په بریدونو کې بې دفاع ولسي وګړي شهیدانیږي، کورونه او عام المنفعه ځایونه په سستیماتیک ډول ورانیږي”.
طالبانو ګواښ کړی که (اشغالګر او مزدور رژيم) د ملکي مرګ ژوبلې لړۍ بنده نه کړي نو دوی به يې غچ واخلي :” داسلامي امارت اتل مجاهدین به دخپلو سرونو په قمیت ددې جنایتونو غچ له دښمن څخه اخلي او خپلې برحقې مبارزې ته به په لا قوت سره دوام ورکوي”.
