ويسا: د طالبانو د له منځه وړو خبرې بازار نه لري
(کابل ټکی کام، ۱۳۹۸، وری ۱۲)
له کابل څخه خپريدونکې ويسا ورځپاڼې د “د جنرال دوستم تکراري رجزونه ” تر عنوان لاندي په سرمقاله کې د ولسمشر د لومړي مرستيال دوستم هغو خبرو ته اشاره کړې چې نوموړي په بلخ کې خپلو پلويانو ته ويلي و که (امنيت شورا اجازه راکړي له ټول هيواده به طالبان ورک کړم) زیاتوي دا د هماغه لاپو تکرار دی چې درې کاله مخکې يې په فارياب او جوزجان کړې وې چې بيا له ناکاميو او مرګونو سره ناهيلی کابل ته ستون شو.
د ورځپاڼې په باور، یادې څرګندونې که د ارګ په تفاهم او یا که د جنرال دوستم خپلې وي نو په وينا يې اوس ډيره ناوخته ده چې دوی طالبان په جګړه کې ختم کړي.
د ويسا په خبره، ټول هيواد يوې خواته کړه یوازې په شمال کې د طالبانو ختمول نه شي کولای زياتوي دا چې دا مهال د امريکا او طالبانو تر منځ د سولې لپاره مذاکرات روان دي، د سولې هيلې زياتې شوي “د جګړې او طالب له منځه وړو خبرې ډير بازار نه لري او نه دا د وخت له غوښتنو سره اړخ لګوي”.
ويسا ليکي، له جنرال دوستم نيولې تر اسدالله خالد او امرالله صالح پورې په تيرو اتلس کلونو کې ازمويل شوي، دوی د جګړې قومندې، استخباراتي ځواکونه، د نړۍ پرمختللې وسلې او وسائل ورسره و او لسګونه زره بهرنيو پوځيانو يې ملاتړ کاوه خو بيا يې هم په هيواد کې امن رانووست او نه به يې له دې وروسته راولي.
