(کابل ټکی کام، ۱۳۹۸، وری ۱۳)
د ملکي وګړو د خونديتوب او عدالت غوښتنې ډله “سي پي اې جي” وايي،په تيره مارچ مياشت کې د افغانستان په اتلس ولايتونو کې ۱۸۴ ملکيان وژل شوي او ۳۰۰ تنه نور ټپيان شوي دي.
سي پي اې جي د ملکي تلفاتو په اړه دغه راپور پرون د دوشنبې په ورځ خپور کړې زياتوي په دغه وژل شويو او ټپي شويو کسانو کې ۵۴ کوچنيان او اووه ويشت تنه ميرمنې دي.
د دغه ډلې مشرر عزیزاحمد تسل وايي، که څه هم په سرتيرو بريدونو او هدفي وژنو کې مرګ ژوبله اوښتې خو زياتوي د بهرنيو ځواکونو هوايي بریدونه، بمبارۍ او شپنيو عملياتو کې ډيری ملکي وګړي په نښه شوي او هغوی ته پکې درنه مرګ ژوبله اوښتې ده.
د راپور له مخې، په لومړي سر کې تر ټولو زياته مرګ ژوبله (۲۴ ملکيان وژل شوي، ۱۲۰ ټپيان) شوي په کابل کې رامنځته شوې زياتوي ورپسې بيا ننګرهار کې چې ۴۲ ملکيان وژل شوي او ۳۴ نور ټپيان شوي دي.
یادې ډلې په خپل راپور کې د کندز هوايي بريد راخيستی چې څوارلس ملکيان پکې ووژل شول زياتوي په هلمند کې په تيره مياشت کې درې تنه وژل شوي او نهه څلوېښت نور ټپيان شوي دي.
د ملکي وګړو خونديتوب ډلې له دولتي، بهرنيو ځواکونو او مخالفو وسله والو غوښتي چې د جګړې پر مهال د ملکيانو خونديتوب ته پاملرنه وکړي.
