طالبان: یوناما د “اشغالګرو او کابل رژیم” دجنایتونو د پټولو هڅې کوي
(کابل ټکی کام، ۱۳۹۸، وری ۱۳)
په وروستيو کې د ګډو ځواکونو په هوايي بريدونو، بمبارۍ او شپنيو عملياتو کې د ملکي خلکو تلفاتو لړۍ تونده شوې چې هره ورځ پکې لسګونه ملکيانو ته مالي او ځاني زيانونه اوړي.
طالبانو د ورځې خبره تر عنوان لاندې په يوه مطلب کې ليکلي، د ګډو ځواکونو په هوايي بریدونو او عملياتو کې سلګونه کوچنيان، ميرمنې او لويان وژل شوي، ښوونځي، کلينيکونه ویجاړ شوي او خلکو ته درانه مالي زيانونه هم اوښتي دي.
طالبانو د روان ۲۰۱۹م کال د تيرې مارچ مياشتې د ګډو ځواکونو په هوايي بريدونو او عملياتو کې د بيلابيلو ورځو ملکي تلفاتو ته ځای ورکړی چې په وينا يې ۱۱۲ ښځې، ماشومان او لويان پکې وژل شوي او ټپيان شوي دي.
مطلب کې راغلي، د ګډو ځواکونو په عملياتو کې تر ټولو زياته مرګ ژوبله د مارچ په ۸مه اوښتې چې د ننګرهار لایت د حصارک ولسوالۍ په ناصرخیلو سیمه کې د ملکي خلکو په کورونو چاپه وهلې او بمبار یې کړی : (په دغه بمبار کې د ډاکټر نظرګل په نوم ملکي هیوادوال د کورنۍ ۱۳ غړي چې اکثره یې ښځې او ماشومان دي شهیدان شوي دي، په همدغه نيټه د میدان وردګ ولایت د سیدآباد ولسوالۍ دتنګي درې په حسن خیلو، جوی زرین او دولت خیلو کلیو باندې په چاپه او بمبارکې ۱ باب مسجد، ۱ کلینیک او ګڼ شمیر کورونه ویجاړ شوي او ۷ تنه ملکي وګړي شهیدان شوي دي، په همدې نيټه د غزني ولایت د آب بند ولسوالۍ په اصغر او دوکوهي کلیو باندې ګډو ځواکونو چاپه وهلې، ۱ باب مسجد، ۱۳ کورونه او ۱ باب دوکان یې نړولي او ۴ تنه ولسي وګړي یې بندیان کړي دي.)
طالبانو د ملکي مرګ ژوبلې یادو تلفاتو ته په اشارې ويلي چې دغه ” وحشت د بشري حقونو ټولنو او یوناما په حضور کې تر سره شوی”خو په کابل کې د ملګرو ملتونو (یوناما) دفتر د ملکي تلفاتو ډیره برخه مجاهدينو ته منسوبوي (د اشغالګرو او کابل رژيم د جنايتونو د پټولو هڅې کوي”.
طالبانو يو ځل بيا ګواښ کړی چې (بهرني او داخلي دښمن) څخه به د خپلو خلکو، مقدساتو غچ واخلي.
