کابل ټکی کام ( سه شنبه، ۱۳ وری، ۱۳۹۸ ل)
د کندهار ولایت د شاه ولیکوټ ولسوالۍ د سرخوبیط سیمې اوسېدونکي وایي چې تېره شپه د هوایي برید له امله ۱۵ تنه ملکي وګړي وژل شوي دي، خو امنیتي چارواکي بیا وژل شوي کسان وسله وال طالبان بولي. دا هوايي بريد تېره شپه د کندهار– اروزګان پر لويه لار د شاه وليکوټ ولسوالۍ د سرخوبيط په سيمه کې پر يوه هوټل شوى دی. د اروزګان د ولايتي روغتون مشر وایي، روغتون ته ۱۳ جسدونه وروړل شوي چې ٩ يې د ګيزاب ولسوالۍ اوسېدونکي وو. د ارزګان مرستیال وایي چې په یاد برید کې د طالبانو ترڅنګ ملکي وګړي هم وژل شوي دي. بلخوا په سوېل کې د ٢٠٥ قول اردو مطبوعاتي مسوول تورن صادق عيسى پرته له دې چې د ملکي مرګ ژوبلې په اړه څه ووایي وویل، وژل شوي کسان طالبان وو. طالبانو تر اوسه په دې اړه څه نه دي ویلي.
یادونه باید وکړو چې په دې وروستیو کې دشپني عملیاتو او ړندو بمباریو له امله په سلګونو ولسي خلکو ته مرګ ژوبله اوښتې، څو ورځې وړاندې په میدان وردګو کې دمیوو موټر دهوايي برید ښکار شو چې ۴تنه عام هېوادوال پکې ووژل شول، خودولت هغه هم طالبان معرفي کړل، بیګاه بیا په فاریاب ولایت کې دیو کور ۹تنه ښځې اوماشومان دهوایي برید هدف ګرځېدلي چې دادملکي مرګ ژوبلې لوړه سلنه ترکیبوي.
