بلخ: طالبانوپه پوستوحملې کړي ۱۳سرتیري یې وژلي
کابل ټکی کام ( چهارشنبه، ۱۴ وری، ۱۳۹۸ ل)
وسلوالوطالبانو په بلخ ولايت کې د امنيتي ځواکونو په پوستو حملې کړي دي چې په نتيجه يې ديارلس امنيتي سرتيرو ته مرګ ژوبله اوښتې ده.
د بلخ ولایت د امنيه قومندانۍ وياند عادل شاه عادل رسنيو ته ويلي دي چې طالبانو تيره شپه ددې ولایت په شولګرې ولسوالۍ کې د امنيتي ځواکونو په پوستو بريدونه کړي دی چې به نتيجه کې يې اته امنيتي سرتيري وژلي او پنځه نور ټپيان کړي دي.
بل لور ته طالبانو هم د بريد مسؤليت منلی دی، دطالبانو ویاند ذبیح الله مجاهدپه خپله ټوېټرپاڼه لیکلي؛ چې ددوی ځواکونو د بلخ په شولګرې ولسوالۍ کې په امنيتي پوستو بريدونو کې يوولس امنيتي عسکر وژلي دي.
د يادونې وړ ده چې په دې وروستيو کې د طالبانو له لوري په جګړو کې تيز والی راغلی دی چې له امله يې د امنيتي ځواکونو په تلفاتو کې هم زياتوالی راغلی دی.
طالبانوڅوورځې وړاندې یوځل بیا له امنیتي ځواکونو غوښتي وو چې د بهرنیو ځواکونو له ملاتړ او جګړو لاس واخلي او خپل عادي ژوند ته وګرځي تر څو د دوی له بريدونو څخه خوندي شي.
طالبانو لاهم خپل پسرلني عملیات ندي اعلان کړي، خومخکې له اعلان څخه طالبانو په دولتي ځواکونو کلکو حملوته زور ورکړی دی.
