زمان مزمل: سرې کرښې او په سوله کې خنډونه د ډالري امتيازاتو د خاوندانو خبرې دي
د تيرې يکشنبې په ورځ د اشرف غني حکومت د (پخلاينې د رهبرۍ شورا) تر نامه لاندې يوه نوې ډله جوړه کړه چې په وينا يې له طالبانو سره به د سولې خبرو پروسه پرمخ وړي.
د دغه شورا وياند عمر داودزي وويل، عبد الرب رسول سياف به سولې مذاکراتو لپاره د حکومت سرې کرښې ټاکي او یادې شورا پریکړه کړې چې د قطر په راتلونکې کنفرانس کې به افغان پلاوي کې حکومتي او غير حکومتي کسان له یوه موقفه خبرې کوي.
ليکوال او جهادي شخصيت استاد محمد زمان مزل د داودزي د خبرو په غبرګون کې قطر ته د حکومتي پلاوي په ليږلو خوښي ښودلې خو زياتوي دا چې حکومت د سولې خبرو کې د سرو کرښو خبرې کوي دا ځکه سم نه دي چې سوله سرې کرښې نه مني.
د مزمل په وينا، دا چې یاده دنده استاد سياف ته سپارل شوې نو بايد د سرو کرښو پر ځای پر شنو کرښو ټينګار وکړي په خبره يې (سرې کرښې او په سوله کې خنډونه د ډالري امتیازاتو د خاوندانو خبرې دي).
ښاغلي مزمل سياف ته مشوره ورکړې په خبره يې حکومت کې داسې څه نشته چې د سولې بديل شي او دفاع ترې وشي.
طالبانو د یکشنبې په ورځ د قطر ناستې په اړه په يوه وضاحت پاڼه کې ويلي و چې په ياد کنفرانس کې به د افغان حکومت په استازيتوب هيڅوک ګډون نه کوي او په شخصي ډول هر څوک کولای شي چې په دغه کنفرانس کې برخه واخلي او خپل نظر شريک کړي.
