کابل ټکی کام (هفته، مرغومی ۱۹مه، ۱۳۹۴ ل):
د کونړ ولایت چپه درې ولسوالۍ کې ترافیکي پېښه شوې چې ۱۶ تنو ته يې مرګ ژوبله اړولې .
د کونړ امنیه قومندان عبدالحبیب سیدخیل نن رسنیو ته وویل چې پېښه تېره شپه هغه مهال رامنځ ته شوه کله چې د چپې درې ولسوالۍ په یوه غرنۍ سیمه کې د سپرلۍ موټر له سړکه ښکته وا وښت .
د سید خيل په وینا، لومړني معلومات ښي چې دغه خونړۍ پېښه د موټر چلونکي د بې احتیاطۍ له امله رامنځ ته شوې ده .
خو چارواکو تراوسه د وژل شوو سپرلیو په اړه دقیق معلومات نه دي ورکړي، چې سپرلۍ د کومې سیمې وه او کوم لوري ته روانه وه .
سليم بریال
