مخابراتو وزارت: که فیسبوک ادارې مو پالیسي ونه منله، فعالیت به یې بند کړو
د مخابراتو وزارت د فیسبوک ادارې ته خبرداری ورکړی دی
د مخابراتو وزیر شهزادګل اریوبي په افغانستان کې د فیسبوک ادارې په فعالیتونو د بندیز ګواښ وکړ
اریوبي چې نن یې په کابل کې یوې غونډې ته وینا کوله وویل چې فیسبوک ادارې که په شپږ میاشتو کې د افغانستان د حکومت پالیسي او قانون عملي نه کړل، په دې هیواد کې به یې فعالیتونه ودروي
د اریوبې په خبره چې د فیسبوک استعمالوونکو لخوا هر وخت ښځو ته سپکاوی او د خلکو توهین کیږي؛ نو له همدې امله باید فیسبوک خپل استعمالوونکي له ځان سره ثبت او راجستر کړي
نوموړي په افغانستان کې د جعلي اکاونټونو د بندولو غوښتنه هم کړې ده
دی وایي چې د بهرنیو چارو وزارت په واسطه به د یو مکتوب له لارې دا ټولې ستونزې د فیسبوک له ادارې سره شریکې کړي
