ليکنه: غورځنګ
خليلزاده!!
يا خو دې ياد ضعيفه شوی او يا خو دې په قطر کې له طالبانو سره شپږ ورځېنی ملاقات له ياده وتلی دی چې په شپږو ورځو کې يوه ټويټ ته هم ورڅخه وزګار نشوې او هغه د چا خبره چې په شپږو ورځو کې دې کلين شيف هم نه وو کړی.
خو څومره فکر چې کووم او ستا شخصيت مې مطالعه کړی دی نو ورڅخه دا نتيجه اخلم چې نه! ياد دې هم دومره نه دی ضعيف شوی او نه هم له يوه سياسي ډيپلوماټ څخه ملاقاتونه او نورې سياسي هلې ځلې دومره ژر له ياده وځي، خو دومره ويلی شم چې اصلاً د خپل عادت له مخې امريکا ته خپله وفاداري ښيې! شايد له طالبانو سره تر ملاقاتونو وروسته دې امريکايان ازمايي چې هسې نه چې سړی بدل شوی نه وي، ځکه چې طالبانو په خپلو ملاقاتونو سره خپل تر ټولو سخت مخالفين هم خپل کړل او د هغوی زړونه يې په خپلو دلايلو تسخير کړل.
نو دا چې ته د امريکا د خارجه پاليسيو جوړوونکی يې، ځکه دې نو ازمايي چې داسې نه چې د امريکا رازونه افشا شي او هسې نه چې ستا زړه طالبانو خپل کړی وي، او د امريکايانو د څو لسيزو هغه خواري چې د مسلمانانو په خلاف يې کړې ده، عبث لاړه نشي.
او که داسې نه وي نو بيا ولې د يوه ډپلوماټ په حيث دومره يو طرفه قضاوت کوې؟؟
کله چې امريکايانو او نورو داخلي ځواکونو د افغانستان په مختلفو ساحو کې خونړۍ چاپې اچولې او د کور نارينه، ښځې، ماشومان او ان حيوانات يې هم په بې درېغۍ سره وژل. په داسې حال کې چې د دواړو لوريو تر منځ په قطر کې خبرې او مذاکرات هم روان وو، هغه وخت چېرته وې؟؟ هغه وخت دې ولې په يوه ټويټ کې پر ګاونډيو او سیمه ييزو هېوادونو يو غږ نه کولو چې د امريکا کړنې د سولې له نړيوالو اصولو سره په ټکر کې دي، په امريکا باندې باید فشارونه زیات شي تر څو دغه ډول بريدونه ودروي؟
خليلزاده!!
هغه وخت خو به دې هم په ياد وي، کله چې ستا د بادارانو لخوا د جوړې شوې اردو يو سرتېری په ميدان وردګو د خپل ولس پر وړاندې ستا د بادارانو د ګټو لپاره جنګېده او ستا بادارانو يې د داخليانو په مرسته په کور چاپه ووهله او کور یې ورته لوټې لوټې کړ، په داسې حال کې چې بې ګناه بچيان اود کور نور غړي يې ورووژل؟
پر دې ټولو مشت نمونه خروار ياداشتونو سربېره کله چې افغان حکومت د خالد په نامه د طالبانو پر وړاندې عمليات اعلانول، هغه وخت به دې هم په ياد وي کنه! که په ياد دې وي نو ولې دې هغه وخت د دولت دغه اقدام د سولې په خلاف نه باله؟ ولې دې هغه وخت پر سيمه ييزو او ګاونډيو هېوادونو غږ نه کولو چې پر افغان دولت دې زور راوړل شي تر څو دغه عمليات چې د سولې پر وړاندې خنډ بلل کېږي؛ ودرول شي؟
خليلزاده!!
خو په ډېره نا انصافي توګه دې د طالبانو انتقامي عمليات وغندل او بيا دې په نا انصافي ډول له سيمه ييزو او ګاونډيو هېوادونو وغوښتل چې د طالبانو دغه عمليات وغندي.
