مشورتي لویه جرګه، که د سولې د روانو هڅو درول
لویه جرګه د پښتنو او قبائلو یوه دودیزه غونډه ده، چې پښتانه یې د خپلو ستونزو او مشکلاتو د هوارولو لپاره جوړوي.
ټاکل شوې ده، چې د غویي پر نهمه نیټه به د مشورتي لویې جرګې تر عنوان لاندې یوه لویه جرګه جوړه شي.
د دې جرګې له جوړولو سره د طالبانو په ګډون تقریباً ټولو سیاسيونو او د ولسمشریزو ټاکنو نوماندانو مخالفت ښودلی او دا یې د ولسمشر غني د انتخاباتو لپاره کمپایني هڅه بللې ده.
کابو دوه یا یو نیم کاله وړاندې پخواني ولسمشر حامد کرزي د لویې جرګې د جوړولو غوښتنه وکړه، چې تر ټولو سخت مخالفت یې ولسمشر غني وکړ، غني ښایي هغه مخالفت د دې لپاره کړی وي چې نوموړي ته یې کومه ګټه په لاس نه ورتله او ډیر امکان موجود وو، چې د ده چوکۍ ته صدمه ورسیږي ، خو دا چې اوس ولسمشر غني خپله د لویې مشورتي مشورتي جرګې د جوړولو هڅې او ټینګار کوي، د ډاکټر عبدالله عبدالله، حنیف اتمر او رحمت الله نبیل په ګډون د ځینو نورو سیاسي شخصیتونو خبره د سړي زړه ته لویږي، چې غني د لویې جرګې له دائرولو څخه خپله ګټه پورته کوي او په انتخاباتو کې یې د یوې لاسته راوړنې په توګه کاروي.
افغان سیاسیون که د لویې جرګې سره په هر بنیاد مخالفت کوي، خو ملت بیا ځکه باور نشي پرې کولای، چې د لویې جرګې تعریف پرې صادق نه دی او د یوې فرمایشي کمپایني غونډې بڼه یې خپله کړې ده.
حکومت هڅه کوي، ترڅو له طالبانو سره د خبرو اترو او د سولې روان بهیر ودروي او په مخ کې یې خنډونه واقع کړي، افغان حکومت دې هدف ته رسیدو لپاره د لویې مشورتي جرګې په جوړولو زیات ټینګار کوي ترڅو د قطر راتلونکې بین الافغاني غونډه وځنډوي او په فکر یې چې د لویې جرګې په مټ به د دوحې د راتلونکې غونډې رنګ پیکه کړي.
په لویه مشورتي جرګه کې د هیواد له ګوټ ګوټ څخه هوښیار سپین روبي، روحاني شخصیتونه، علماء او همدا رنګه نور ټولمنلې څېرې ګډون کوي، خو برعکس اوسنی مشورتي لویه جرګه د یو سیاسي مقابلې لپاره جوړیږي او ټول به هغه کسان ګډون پکې کوي، چې دا شته مشکلات د دوی له وجې راپیښ شوي ده؛ نو دا داسې شوه لکه یو څوک چې په مردارو اوبو د نجاست د پاکولو ناکامه هڅه کوي.
دا چې راتلونکې لویه جرګه د یوه ورک هدف او انتخاباتي کمپاین لپاره جوړیږي او حکومت یې د خپلو شخصي ګټو او د شخصي موانعو د ختمولو لپاره استعمالوي، ملت ته په هېڅ صورت د منلو وړ نه ده او تر هر چا وړاندې یې ملت ردوي، د ملت لخوا د ردولو یو بنسټیز لامل یې دادی چې دا جرګه د سولې په مخ کې خنډ ده او ملت تر هر څه وړاندې سولې ته ضرورت او اړتیا لري
