م. عمر
د روسیې د بین الافغاني کنفرانس په تعقیب د دې میاشتې په ۲۰مه د قطر هیواد په دوحه کې یو بل بین الافغاني مجلس په پام کې نیول شوی وو چې اوس تر نامالومې مودې پورې وځنډید.
په قطر کې د دې بین الافغاني کنفرانس جوړونکي ( د شخړو او مطالعاتو مرکز ) رئیس سلطان برکات د کنفرانس د ځنډ لامل د غونډې د ګډونوالو په سر نه اجماع ښودلې ده.
تر دې وړاندې چې په مسکو کې د بین الافغاني ناستو په بهیر کې لومړی مجلس ترسره شو، د ارګ د چارواکو سخت ارګی بد وو او دا یې د افغانستان په ملي خپلواکي یو ډول تیری باله.
له هغه وروسته چې کله د دوحې د غونډې بحث مطرح کیده، هم د ارګوالو لخوا هڅه کیده چې په یو ډول نه یو ډول یې مخه ونیسي.
د قطر د غونډې د مخنیوي لپاره د ارګوالو لخوا لومړی ګام دا وو، چې د لویې مشورتي جرګې د جوړولو نغارې یې غږولې خو کله چې پوه شول چې افغان ملت په دې ناروا هڅو نشي غولیدلی نو یې د دوحې د غونډې لپاره د خپل هیئت اعلان وکړ.
لومړی خو باید دا خبره وشي چې طالبان هېڅ کله د افغان حکومت سره ناستې ته تیار نه دي نو د حکومت لخوا د کسانو ورلیږل څه مانا؟ او که له دې بحث نه راتیر شو نو بیا د دوحې د غونډې لپاره د ارګ لخوا خپور شوی لیست یقیناً هم د خندا وړ وو او له ورایه پکې د سولې د هڅو سبوتاژ ښکاره کیده.
ارګ دا لیست د دې لپاره نه وو خپور کړی، چې رښتیا هم دوی سولې ته ژمن دي بلکې د دې لیست په خپراوي کې دوی د خپلو هوسونو بقاء لیدله او دا یې د غونډې د لغوه کیدو لپاره چمتو کړی وو.
ارګوال پوهیدل چې زموږ خپور شوی لیست نه طالبانو ته د منلو وړ دی او نه د کنفرانس جوړوونکو ته، خو د دې لپاره چې بیا له دوی سره د دې بین الافغاني کنفرانس د لغوه کیدو یوه بهانه موجوده وي نو یې دا کار یې وکړ.
د ارګوالو نفسي خواهشات ټول پوره دي، او په روان وحشت خوند اخستل هم د دوی د نفس یوه تقاضا ده، او د خپلو خواهشاتو د پوره کیدو پخاطر به دوی ډیرې هڅې وکړي چې د سولې مخه ونیسي خو افغانانو چې ۱۸ کاله زغم او حوصله کړې ده، دغومره نوره هم کولای شي او له هرې ممکنې لارې نه په استفادې به ارو مرو سولې ته ځان رسوي خو د سولې، وطن او ملت دښمنان به اخر هم ذلیله کیږي او په تاریخ کې به د یو بدنامې څیرې او د ملت د دښمن په نوم ثبتیږي.
