کابل ټکی کام ( جمعه، ۳۰وری، ۱۳۹۸ل)
راپورونه وايي چې د هلمند په ګرشک ولسوالۍ کې له وسله والو طالبانو سره په مخامخ نښته کې ۴ تنه امریکايي او کمانډو پوځیان وژل شوي دي.
د طالبانو ویاند قاري یوسف احمدي رسنیو ته ویلي، چې وړمه شپه امریکايي ځواکونو د کمانډویانو په ملتیا د ګرشک ولسوالۍ په قلعه ګز سیمه کې د شپنیو عملیاتو په پلمه ورغلي وو، چې د طالبانو له ځوابي بریدونو سره مخ شول او سخته نښته رامنځ ته شوه.
احمدي زیاتوي، په دغه نښته کې ۲ تنه امریکايي او ۲ تنه کمانډو پوځیان وژل شوي او یو شمېر نور ټپیان دي.
د احمدي په خبره بهرنیو ځواکونو د خپلو وژل شوو پوځیانو جسدونه د چورلکې په مټ له سیمې څځه انتقال کړي او سیمه یې تخلیه کړې ده.
په افغانستان کې د امریکايي پوځیانو ویاند تر اوسه په هلمند کې د وژل شوو امریکايي پوځیانو د هویت او شمېرې هکله رسنیو ته څه ویلي نه دي.
د امریکا ددفاع وزارت د پالیسۍ له مخې افغانستان کې د وژل شوو امریکايي پوځیانو هویت وروسته له هغه رسنیز کیږي، چې د وژل شوو پوځیانو کورنیو ته په دې هکله خبر ورکړل شي.
دیادونې وړ ده چې دطالبانو دپسرلنیو عملیاتو تراعلان وروسته دهېواد لر اوبر دخونړیو جګړو شاهد دی، چې دکډو ځواکونو مرګ ژوبله هم ورسره لوړه شوې.
