(کابل ټکی کام، ۱۳۹۸، وری ۳۱)
ګډو ځواکونو د غزني ولايت په ګيلان ولسوالۍ کې شپني عمليات کړي چې پر مهال يې ګڼو ملکيانو ته مرګ ژوبله اړولې ده.
ځايي سرچينې وايي، دغه عمليات تيره شپه د افغان او بهرنيو ځواکونو له خوا د يادې ولسوالۍ مربوط په خاټکو او لونګ سيمو کې ترسره شوي دي.
راپور زياتوي، د عملياتو په ترڅ کې د ځايي خلکو ۲۲ عرادې موټران او موټرسيکلونه د عسکرو له خوا سوځول شوي او ملکيانو ته مالي زيانونه اړولي دي.
د سيمې اوسيدونکي وايي، په دغه عملياتو کې نهه تنه ملکيان وژل شوي، دوه ميرمنې او درې کوچنيان ټپيان شوي دي.
وړمه شپه هم ګډو ځواکونو د یادې ولسوالۍ په تس کلي کې عمليات ترسره کړي و چې پر مهال يې خلکو ته درانه مالي زيانونه اړولي و او یو تن ملا امام او کليوال يې له ځان سره د بنديانو په توګه وړي و.
طالبانو وخت ناوخت پر ملکي خلکو د ګډو ځواکونو عملیات غندلي او دا يې جنګي جنايت او حشت بللی دی.
له تير یوه کال راهيسې ګډو ځواکونو شپني عمليات او هوايي بريدونه زيات کړي چې تر ډيره پکې ملکي وګړي په نښه کيږي.
که څه هم ځينو بنسټونو د يادو عملياتو د بنديدو غوښتنه کړې خو لا هم مسؤولو کسانو په دې اړه جدي اقدام نه دی کړی او هره شپه پکې ملکي خلکو ته د ځاني زيان تر څنګ درانه مالي تاوانونه هم اوړي.
