نوماندان : راتلونکي مياشت دې ولسمشر واک پريږدي؛ ارګ يې نه مني
(کابل ټکی کام، ۱۳۹۸، غویی ۱)
د ولسشمريزو ټاکنو يوولس نوماندانو په خپره کړې ګډه اعلاميه کې ويلي، چې د راتلونکې غبرګولي مياشتې په لومړۍ نيټه د ملي ووالي حکومت دوره پای ته رسيږي او ولسمشر بايد واک پريږدي خو ارګ د واک پريښودل نه مني وايي لا هم څو مياشتې پاتې دي.
د نوماندانو په اعلاميه کې راغلي، د راتلونکې مياشتې له لومړۍ نيټې وروسته د حکومت قانوني مشروعيت له منځه ځي چې بايد د حکومتي مشرانو ورته پام وي.
نوماندان وايي، داسې اسناد يې موندلي چې ښيي حکومت پر ستره محکمه فشار واردوي څو د غني د واک غځولو مودې ته لارې چارې برابرې کړي.
له بله پلوه د ولسمشرۍ د ویاند مرستيال شاه حسين مرتضوي وايي، د ولسمشر غني د پنځه کلنې کاري دورې د بشپړيدو لپاره لا هم شپږ مياشتې وخت پاتې دی.
نوموړی وايي، د قانون د تفسير مرجع اساسي قانون دی چې پخوا هم ورته ډول بحثونه مطرح شوي زياتوي د ملي يووالي حکومت مشران د اساسي قانون په چوکاټ کې خپل کار ته دوام ورکوي.
دا په داسې حال کې ده، چې څو ورځې مخکې هم د ولسمشرۍ نوماندانو په يوه ګډه اعلاميه کې ګواښ کړی و که ولسشمرغني د غبرګولي مياشتې په لومړۍ نيټه خپله کاري دوره پای ته ونه رسوي نو کړکيچونه به رامنځته شي.
