کابل ټکی کام ( سه شنبه، ۳ غوايي ، ۱۳۹۸ل)
د ټاکنیزو شکایتونو خپلواک کمیسیون وایي، د راتلونکو ولسمشریزو ټاکنو د احتمالي نوماندانو د اسنادو ارزول یې بشپړ کړي او وروستۍ پایلې یې د ټاکنو کمیسیون ته لېږلې دي.
د دې کمیسیون منشي محمد قاسم الیاسي نن په کابل کې یوې خبري ناستې ته په خبرو کې وویل، څېړونکې کمیټې ددولت له اړونده ارګانونو سره د نوماندانو اړوند مسایل شریک کړي او د کره معلوماتو د تر لاسه کولو وروسته یې یو لیست ټاکنو کمیسیون ته لېږلی دی.
نوموړی زیاتوي، د ولسمشرۍ ټاکنو د نوماندانو د وروستي لیست اعلانول د ټاکنو کمیسیون دنده ده.
په ورته وخت کې ټاکنو کمیسیون ویلي، په دقت سره د لیستونو تر مطالعې وروسته به خپل وروستی تصمیم اعلان کړي.
دوه ورځې وړاندې سترې محکمې تر ولسمشریزو ټاکنو داوسني ولسمشر اشرف غني واک تمدید کړ، خو راتلونکو ټاکنو ته نوماندان دجوزا تر اولې نیټې دغني واک یادوی، اوترجوزا وروسته دموقت حکومت غوښتنه کوي.
