م. عمر
تیره ورځ په ننګرهار کې د یوې سیمییزې رادیو په خبریال عمران لمر د نامالومو وسلوالو لخوا برید وشو او سخت یې ټپي کړ.
د لمر ټپي کیدو په سوشل میډیا کې یوه غوغا جوړه کړه او له چارواکو جدي غوښتنه وشوه، چې نوموړی باید د عاجلې روغتیا لپاره کابل ته په الوتکه کې یووړل شي.
په لمر برید او د هغه ټپي کیدل د هر چا لپاره خواشینونکې ده، دا د ژورنالیستانو په حق یو تیری بللی شو، زموږ او ستاسو ټولو مسؤلیت دی چې دده د دفاع غږ پورته او پوښتنه یې وکړو چې ولې برید پرې وشو؟
خو لکه څنګه چې د لمر د غږ پورته کول زموږ مسؤلیت دی همدا رنګه د هیواد د هر بچي، هرې لور، د هر پلار، هرې مور، د هرې کونډې او هرې بور غږ پورته کول هم زموږ د مبارزې یوه برخه ده او د دوی ټولو دفاع هم زموږ حق جوږیږي.
ولې هغه کسان چې د لمر په ټپي کیدو یې په سوشل میډیا کې د خفګان اظهار او له حکومته یې غوښتنه کوله چې عمران دې په الوتکه کې کابل ته ولیږل شي، زما د هیواد په دې نورو بچو څه نه وایي او له شرمه ډک سکوت یې اختیار کړی دی؟
دا هره شپه د هیواد په بیلا بیلو ځایونو کې د ګډو ځواکونو په عملیاتو او بمباردیو کې بیګناه افغانان شهیدانیږي او کورونه یې بمباردیږي، ولې دا کسان له حکومته غوښتنه نه کوي چې له الوتکو نه د عامو او بیګناه افغانانو د وژلو کار مه اخلئ، بلکې یو ناروغ له ننګرهاره کابل ته پکې ورسوئ.
دا کسان ولې په همدې ننګرهار کې د دې هیواد د هغه بچي پوښتنه نه کوي چې د ننګرهار په پوهنتون کې د اقتصاد پوهنځي محصل وو او تیره شپه د ګډو ځواکونو په شپنیو عملیاتو کې له نورو ۱۱ بې ګتاه مظلومو افغانانو سره یو ځای ووژل شو؟
ایا د دې هیواد بچی یواځې عمران لمر دی؟ ایا دا نورو خلک افغانان نه دي؟ او ایا د افغانیت همدا تقاضا ده چې یواځې په عمران لمر اوښکې توی کړه او د ده په ګاونډ کې د یوې بلې مور د زړه ټوټه شهیدیږي او ته څه مه وایه؟
نه، افغانیت او اسلامیت دا نه دی، افغانیت دادی چې د هیواد په هر وګړي وژاړې او د هرې مور د زړه درد حس کړې او د دې هیواد هر بچی خپل بچی، ورور او پلار وبولې.
افغانیت دادی، چې د خپلو نیکونو له هغه تاریخ نه ګرد څنډ وهې چې تا ورته تکیه وهلې ده او بیا د هغه تاریخ په مقتضا عمل وکړې، اشغالګر له هیواده وشړي او خپل هیواد د خپلو مټو په زور اباد او سوکاله کړې، بیا به نه څوک لمر ته بد کتلای شي، نه به د اقتصاد د پوهنځي محصل څوک شهیدوي او نه به هم زما د هیواد بل بچی دردمن کیږي.
