د ملکي مرګ ژوبلې لړۍ: پروان کې د ګډو ځواکونو عملياتو کې اووه تنه وژل شوي
(کابل ټکی کام، ۱۳۹۸، غویی ۷)
په وروستيو کې د ګډو ځواکونو شپني عمليات او هوايي بريدونه زيات شوي چې ورسره د ملکي تلفاتو لړۍ هم تونده شوې او هره شپه د هيواد په بیلابيلو سيمو کې د عملياتو پر مهال ملکيانو ته مرګ ژوبله اوړي.
تيره شپه ګډو ځواکونو د پروان ولايت د مرکز مربوط په خلازيو سيمه کې عمليات کړي چې د ځايي اوسيدونکو په وينا اووه تنه ملکي وګړي يې وژلي او اووه تنه نور ملکيان يې له ځان سره وړي دي.
د یادې سيمې اوسيدونکي وايي، عملیاتي عسکرو د ګڼو کورونو دروازې په بمونو الوزولي، د خلکو له کورونو يې قيمتي مالونه او پيسې هم وړي دي.
طالبان هم په ياده سيمه کې د ملکيانو وژل کيدل تاييدوي او یاده پيښه يې جنايت بللی دی.
ګډو ځواکونو پرون هم د ننګرهار ولايت خوګياڼو کې د دوو ښوونکو او يوه محصل په ګډون يوولس تنه ملکي وګړي د شپنيو عملياتو پر مهال وژلي و او له هغې يوه شپه مخکې يې د دغه ولايت په مومندرې ولسوالۍ کې د يوه پلار او درې زامنو په شمول پنځه تنه ملکيان وژلي و.
د ملګرو ملتونو مرستندوی دفتر یوناما په خپل وروستي راپور کې د ملکي مرګ ژوبلې درې پنځوس سلنه په حکومتي ځواکونو اچولې وه چې په وينا يې په شپنيو عملياتو او هوايي بريدونو کې ملکيانو ته اوښتې ده.
طالبانو د ياد راپور په غبرګون کې ويلي و چې د ملکي تلفاتو مخنیوی یوازې د ارقامو په خپرولو نه کيږي بايد په دې اړه لازم اقدامات وکړای شي.
