سکاټ میلر له هغو سرتیرو لیدنه کړې چې د لویې جرګې امنیت ساتي
کابل ټکی کام ( دوشنبه، ۹ غوايي ، ۱۳۹۸ل)
په افغانستان کې د میشتو بهرنیو ځواکونو عمومي قومندان جنرال سکاټ میلر له هغو سرتیرو لیدنه کړې چې د لویې جرګې امنیت یې نیولی دی.
له سکاټ میلر سره د کورنیو چارو مرستیال وزیر خوشال سادات هم وو چې د امنیتي ځواکونو له پوستو یې لیدنه وکړه.
سکاټ میلر په داسې حال کې له امنیتي پوستو څخه لیدنه کوي چې د کورنیو چارو وزارت ویاند نصرت رحیمي بي بي سي ته ویلي د امنیت د ټینګښت لپاره یو بهرنی پوځي هم نه دی ګمارل شوی.
نن په کابل کې د لویې مشورتي جرګې تر عنوان لاندې یوه غونډه روانه ده چې د حکومت د سیاسي مخالفینو له لوري د ولسمشر غني لخوا یوه کمپایني هڅه بلل کیږي او زیات شمیر سیاسي څیرو پکې له دې امله ګډون نه دی کړی چې په وینا یې دا د سولې د روانو هڅو د سبوتاژ هڅه ده.
