ننګرهار کې د ۲۲ داعش وسله والو د وژلو ادعا
(کابل ټکی کام، ۱۳۹۸، غویی ۱۰)
د ننګرهار ولايتي چارواکي ادعا کوي چې د دغه ولايت په خوګياڼو ولسوالۍ کې يې د عملياتو پر مهال دوه ويشت داعش وسله وال وژل شوي دي.
د ننګرهار ولايت د رسنيو دفتر له خوا په خپره شوې خبرباڼه کې راغلي، چې دغه عمليات تيره شپه د یادې ولسوالۍ مربوط د زاوې په سيمه کې د ځانګړو ځواکونو له خوا ترسره شوي دي.
خبرپاڼه کې راغلي، د عملياتو پر مهال د داشع وسله والو څلور مرکزونه له منځه وړل شوي او د داعش سره د اړيکو په تور دوه تنه نيول شوي دي.
داعش له تيرو څو کلونو راهيسې په ننګرهار کې له طالبانو سره جګړه پر مخ وړي او ډیری هغه سيمې چې پخوا د طالبانو سره وې په وروستيو کې داعش وسله والو حکومت ته پريښي او ډير کله د طالبانو تر حاکميت لاندې سيمو کې بریدونه کوي چې ډير زيان يې ملکي خلک ګالي.
که څه هم حکومت وخت ناوخت پر داعش وسله والو د عملياتو او هغوی ته د مرګ ژوبلې اړولو ادعا کوي خو د دغه ولايت ځينې پخواني وکيلان او د سيمې اوسيدونکي حکومت د داعش سره په مرسته کولو تورنوي.
د ځايي اوسيدونکو په وينا، څو ځلې داسې پيښې رامنځته شوي چې طالبان د داعش په مرکزونو عملياتو او بريدونو ته امادګي ونيسي خو کله چې يې عمليات کاميابيږي نو د بهرنيانو او دولت د هوايي ځواک له خوا تر بريدونو لاندې نيول کيږي.
له تيرو څو ورځو راهيسې داعش وسله الو د خوګياڼو ولسوالۍ په زاوه او وډيسار سيمو کې بريدونه کړي چې له کبله يې لسګونه کورنۍ کډې کولو ته اړ شوي دي.
