غزني: د هاوان مرمۍ لګیدو له امله ۵ تنه وژل شوي
د غزني ولایت په اندړو ولسوالۍ کې د هاوان مرمۍ لګیدو له امله ۵ تنه بیګناه افغانان وژل شوي دي.
دا پیښه تیره شپهد د اندړو ولسوالۍ په نیاز سیمه کې رامنځته شوې ده.
د سیمې خلک بیا وايي چې مرګ ژوبله د ګډو ځواکونو د عملیاتو پر مهال هوایي برید رامنځته کړې ده.
دوی وایي چې ۸ کسان وژل شوي او ۴ تنه نور ټپیان دی.
د غزني د والي ویاند عارف نوري پیښه تائیدوي خو وایي چې د طالبانو او امنیتي ځواکونو د جګړې پر مهال هاوان توغول شوی او مرګ ژوبله یې رامنځته کړې ده.
د نوري په وینا چې تر اوسه لا مالومه نه ده چې هاوان د چا له لوري توغول شوی خو د پلټنو یادونه یې کړې ده.
دېته ورته پیښې ډیری وخت د امنیتي ځواکونو لخوا د بې هدف فایرونو له امله رامنځته کیږي.
څو اونۍ مخکې هم په همدې ولایت کې د امنیتي ځواکونو لخوا توغول شوی هاوان د ملا نوح بابا په لیسه ولګید چې ۲۱ تنو ماشومانو ته پکې مرګ ژوبله واوښته.
په دې وروستیو کې د ګډو ځواکونو لخوا په شپنیو عملیاتو کې زیات وخت ملکیانو ته تلفات اوړي خو حکومت یې تر اوسه په ضد کوم اقدام نه دی ترسره کړی.
