(کابل ټکی کام، ۱۳۹۸، غویی ۱۹)
په جرمني کې د ايغور مسلمانانو دفتر “د ايغور نړیوال کانګرس” ويلي د چین حکومت په سينګيانګ ايالت کې په مسلمانانو د روژې په نيولو بندیز لګولی او په سرغړوونکو يې سزا ټاکلې ده.
دوی اندېښنه ښودلې که مسلمانان د هغوی له امر سرغړونه وکړي نو ښايي چين حکومت ورته ډلييزه سزا ورکړي.
په جرمني کې د ايغور مسلمانان چې ډيره موده مخکې د چين د بيلابيلو بنديزونو له امله تښتيدلي وايي، چين حکومت د هغو مسلمانانو څارنه هم کوي چې په حکومت کې دندې لري ترڅو معلومه کړي چې خپل دين يې پريښی او که لا هم مسلمانان دي.
په جرمني کې د ايغور مسلمانانو ډله وايي، حکومت مسلمانو محصلينو ته امر کړی چې اوونۍ کې بايد درې ورځې خامخا د غرمې خوراک وکړي او که ويې نه کړي نو بیا به روزنيزو پنډغالو ته ليږل کيږي چې هلته ورته د اسلام دين پریښودلو روزنه او سخت بنديزونه ورباندې پراته دي.
په چين کې په ايغور او د دغه هيواد په نورو مسلمانانو کلک بنديزونه لګيدلي او حکومت يې ږيره پريښودل، لمونځ او روژې نيول، او پرده کول سختدريځي ګڼي.
دا لومړی ځل نه دی چې چين کې پر ايغور مسلمانانو د روژې بنديزونو راپورونه ورکول کيږي بلکې په دغه هيواد کې له مخکې څخه مسلمانانو سره سخت ظلمونه کيږي، هغوی په زور سره په ځانګړو پنډغالو کې ساتي چې يو ډول زندانونه هم بلل کيدای شي او څوک چې د اسلام دين حکمونه پر ځای کوي سزا ګانې ورکول کيږي.
