کابل ټکی کام( یکشنبه، ۲۲غوایي، ۱۳۹۸)
تیره شپه د ګډو ځواکونو په عملیاتو کې په غزني کې ملکي کسانو ته تلفات اوښتي دي.
دا پیښه د غزني په اندړو ولسوالۍ کې رامنځته شوې ده.
له سیمې څخه یو تن سید صالح اسحاق راته وویل چې تیره شپه د ګډو ځواکونو د چاپې پر مهال ۷ تنه په داسې حال کې ووژل شول چې په خټو لګیا وو.
د نوموړي په وینا چې وژل شویو کسانو د روژې په خاطر د شپې کار کاوه چې له داسې یوې ناوړه پیښې سره مخ شول.
دا لومړی ځل نه دی چې د امریکایي او کورني عسکرو د عملیاتو پر مهال ملکیان وژل کیږي بلکې هره شپه د هیواد په یوه برخه کې د دوی لخوا د ملکي تلفاتو خبر ورکول کیږي.
تیره شپه یې په کندوز کې هم چاپه وهلې، کورونه یې نړولي او کلیوال یې سخت شکنجه کړي دي.
څو ورځې وړاندې یې د ننګرهار په چپرهار ولسوالۍ کې د یو ښوونکي په کور چاپه وهلې وه چې د ښوونکي په ګډون یې یو بل تن هم سوځولی وو او همدا رنګه د کور د سوځیدو تر څنګ یې د قران نسخې او تفاسیرو ته هم او ورته کړی وو.
افغان حکومت د داسې پیښو په اړه هېڅ هم نه وایي او تل یې په داسې مواردو کې چپتیا غوره کړې ده.
