ابوطيب
ولسمشريزو انتخاباتو باندې ميليونونه ډالر مصرف شول، ولسونو خپلې رائې وکارولې او لسګونه امنيتي ځواکونه يې دفاع کې ووژل شول يا ټپيان شول، خو د دې پر ځای چې مصرف شوې بوديجې ته وکتل شي، د ولسونو رائيو ته وکتل شي او پر اساس يې انتخاب وشي او وژل شوو عسکرو ته وکتل شي، يو پليت انسان -جان کيري- راځي په يوازې سر ولسمشر او اجرائيه مشر ټاکي او پورته موارد شاته غورځول کيږي.
ټکي په ټکي دغه کيسه د ولسي جرګې انتخاباتو سره وشوه، د دې پر ځای چې د ولس په رائيه استازي او د جرګې مشر وټاکل شي نورو محدودو بې ضميرو خلکو ته د انتخاب واک ورکول کيږي.
ددې دواړو کيسو څخه معلوميږي چې امريکا او دده د ګوډاګی ادارې لوړپوړي مشران خلکو ته چل ورکوي د خلکو سترګو کې خاوري اچوي:خلک ستړي کړي، رايه ترې واخلي، په مليونونه بيت المال يې مصرف کړي او لسګونه بچيان يې د دفاع په نامه له دنيا ورک کړي او بيا انتخاب په يو نجس امريکايي او يا د دوی په څو غلامانو کوي.
ولس دې نور د دوی پدې چلونو نه غوليږي د دوی لمن او د انتخاباتو جعلي پروسو ته دې شا وګرځوي او د دوی په مسلطولو دې نور دا مظلوم ولس نه زوروي.
