استاد حسین احمد ملاخیل
کله چې په لومړۍ نړیواله جګړه کې عثماني خلافت د اروپا په وړاندې شکست وخوړ. په اروپا کې دې فتح ته د اروپا لوړ پوړو چارواکو په کومه سترګه وکتل، د دوی د زړه تصورات او خاطرات څه وو. پدې اړه مونږ ته د اروپا بالخصوص د بریطانیې د یو لوی انسان چرچل خاطرات پدې الفاظو کې لاس ته راځي:
” د اسلام او مسلمانانو څخه د بیت المقدس له لاسه وتل زمونږ مسیحانو او یهودیانو دواړو ګډ خوب او نصب العین وو، فلهذا ددې په لاس ته راوړلو کې چې کومه خوشحالي مسیحانو ته حاصله شوې نه یوازې مسیحانو بلکې یهودانو ته هم د خوشحالۍ ځای دی. اوس مونږ ټولو ته د خوشحالۍ خبره ده چې بیت المقدس د اسلام او مسلمانانو څخه ونیول شو”
همدارنگه کله چې بریطانوي جنرال ” لوبنی ” بیت المقدس ته د فاتح په حیث داخل شو خپل جذبات یې پدې شکل بیان کړل:
” نن یو صلیبي جنګ پای ته ورسید “
کله چې د جنرال لوبني د فتحې خبر لندن ته ورسید، نو بریطانوي رسنیو کې جنرال لوبنی د صلیبي جنګونو تر ټولو لوی فاتح ونومول شو. او بیا برطانوي صدراعظم، پارلمان او د خارجه چارو وزیر جارج الآیید دوی ټولو دې حملو ته د صلیبي جنګونو اتمه حمله وویله. او ټولو جنرالانو ته یې په لوړه سترګه وکتل. او د صلیبي جنګونو فاتحین یې وبلل.
د دوی ترڅنګ فرانسې هم د عثماني خلافت سره خپل جنګونه صلیبي جنګونه وګڼل، چې شهادت یې خپله فرانسوي جنرال هلته وکړ. کله چې فرانسوي جنرال غورد د سوریې هیواد د فتحې څخه وروسته دمشق ته لاړ او ترکیې فوځیانو یې پر وړاندي خپل اسلحي په ځمکه کېښودې او چټک د دمشق اوموی جامع جومات ته لاړ او د سلطان صلاح الدین ایوبي قبر یې په لغته وواهه او وې ویل:
” پاڅه! صلاح الدینه پاڅه! وګوره!! چې نن مونږ د خپلو ناکامیو بدل واخيست او ستا خاورې ته د فاتح په حیث راغلي یو “
همدارنګه کله چې فرانسې په المغرب(مراکش) حمله وکړه، د فرانسې د پارلمان ځینې غړو د خارجه وزیر څخه د جنګ د بندیز غوښتنه وکړه. د فرانسې خارجه وزیر یې جواب پدې الفاظو ورکړ ” دا جنګ نه ودریږی، ځکه دا جنګ د فرانسې او مراکش ترمنځ نه دی بلکې دا جنګ د صلیب او هلال تر منځ دی”
امریکا چې د ټولو اروپایي ځواکونو په لاس کې ځای لري، د ټولو اسلامي هیوادونو لپاره چې کومې پالیسۍ برابره وي، اساس یې هم هغه صلیبي جنګونه دي چې تر ننه شروع دي. د امریکا د یو پخواني ولسمشر د مشاور وینا ده ” مونږ باید پدې ځان پوه کړو چي زمونږ او د عربي قوم ترمنځ اختلاف صرف د دوه قومونو ترمنځ نه دی، بلکې دا په اصل کې د اسلامي او مسیحي تهذیب، تقافت او کلتور ترمنځ اختلاف دی ” همدارنګه یاد مشاور زیاتوي چې ” د نن تاریخو حالاتو ته په کتو دا خبره واضحه ده چې امریکا د غربي نړۍ یوه کامله برخه ده، مونږ د غربي فلسفې نه یوازې ترجمانان یو، بلکې مونږ باید د اسلامي نړۍ په وړاندې یو دښمن صفته تصور او موقف غوره کړو “
کله چې څوک پخپله اعتراف وکړي او مونږ دشمن وګني. نو څنګه یې مونږ خپل ملګري اوبین المللي دوستان وګڼو؟. الله(ج) هم فرمایي چې یهود او نصارا ستاسو دوستان نه شي کیدای تردې چې تاسو له خپل دین څخه واړوي. او د هغوی ملت وګرځئ. نن چې څوک یهود او نصارا خپل دوستان ګڼي بېشکه چې خپل دین يې پریښی دی. یعنې د حتی څخه وروسته خلک دي.
