شعر…حافظ سميع الله .سمون…
د رنځور ولس دوا شه سولې راشه
ژړېدونکو ته مسکا شــــــه سولې راشه
په وطن کې د یرغل وحشي دوران ته
خاتمه شه انتــها شه سولې راشه
د نفرت او تعصــب تیارې خورې دي
د الفت سپينه رڼاشه سولې راشه
د خزان ترخې سیلۍ دي بدرنګي ده
د بهار خوږه ښکلا شه سولې راشه
چې مړژواندی ملت بیا پکې ژوندی شي
د خوښۍ مسته فضا شـــه سولې راشه
په مظلوم قام مې د رحم وزر خور کړہ
د يتيم په خوله خندا شه سولې راشه
په سلګیو کې دې غواړو درته ژاړو
بس کړہ راشه نورہ راشه سولې راشه
درناوی ځمونږ د ستړو هیلو وکړه
په مسکا مسکا ګويا شه سولې راشه
د حــافظ سـمون دردمند ستومانه خوب ته
ښه تعبير شه، ښه معنا شه سولې راشــــه
