یوناما په هوایي بریدونو کې د ملکي مرګ ژوبللې په اړه اندیښنه ښودلې
کابل ټکی کام( پنجشنبه، ۲غبرګولي، ۱۳۹۸)
د ملګرو ملتونو لخوا په افغانستان کې مرستندویه “یوناما” ادارې د ملکي مرګ ژوبلې په اړه اندیښنه ښودلې ده.
یوناما د هلمند او کونړ هوایي بریدونو ته اشاره کړې چې د بهرنیو او کورنیو ځواکونو لخوا په ګډه ترسره شوي دي.
دا بریدونه د هلمند په ګرشک او د کونړ په څوکۍ ولسوالۍ کې شوي دي.
په دې بریدونو کې لسګونه بیګناه کسانو ته مرګ ژوبله اوښتې چې د ماشومانو په ګډون ښځې هم پکې دي.
د یوناما د راپور له مخې چې په دې بریدونو کې ۱۴ تنه ملکي کسان وژل شوي چې ۵ میرمنې او ۷ تنه ماشومان هم په وژل شویو کې شامل دي.
یوناما د کونړ او هلمند دا برید په داسې حال کې غندي چې په دې وروستیو کې د هیواد په بیلا بیلو برخو کې د ګډو ځواکونو په شپنیو عملیاتو کې ملکي وګړو ته مرګ ژوبله اوړي.
د ګډو ځواکونو لخوا د ملکي تلفاتو زیاتوالي خلک په اندیښنه کې اچولي خو وایي د دوی اندیښنې هېڅ نتیجه نه ورکوي ځکه چې حکومت یې په ضد هیڅ اقدام نه دی ترسره کړی.
څو ورځې وړاندې د بهرنیو ځواکونو په یو هوایي برید کې لسګونه امنیتي ځواکونو ته مرګ ژوبله واوښته خو افغان حکومت یې په اړه هیڅ غبرګون ونه ښود.
د سوشل میډیا فعالانو افغان حکومت ننګولی او وایي، که حکومت د ملکي تلفاتو په اړه څه نشي ویلای نو کم از کم د خپلو سرتیرو د وژل کیدو په اړه خو دې څه ووایي
