کابل ټکی کام( پنجشنبه، ۲غبرګولي، ۱۳۹۸)
د طالبانو ویاند ذبیح الله مجاهد د افغان حکومت هغه ادعا رد کړې چې ګواکي د دوی “الفتح” عملیات ناکام شوي دي.
د افغان حکومت چارواکو د طالبانو د الفتح عملیاتو په اړه ویلي چې د دوی دا عملیات ناکام شوي او همدا رنګه امنیتي ځواکونو په خپلو عملیاتو کې طالبانو ته زیات تلفات وراړولي دي.
مجاهد د ې خبرو په غبرګون کې ویلي چې د افغان حکومت دې د دې ادعاوو په ځای په خپلو مظالمو او د ولسي خلکو په ځورونو فکر وکړي او په وینا یې په هغو باندې باید “وشرمیږي.”
مجاهد د ملکي تلفاتو په اړه ویلي چې هره شپه په اوسط ډول له ۱۰ نه تر ۲۵ پورې ملکي خلک وژل کیږي او د فراه ولایت وروستي برید ته یې اشاره کړې او ویلي یې دي: “د روان ۱۳۹۸ لمریز کال د ثور میاشتې په ۱۵ تاریخ امریکايي الوتکو په یوه ورځ کې د فراه ولایت د بکوا ولسوالۍ په اشکین، پلوشي او سپين کاریز سیمو کې له ۵۰ زیات د ملکي خلکو کورنه بمبار کړل او څه باندې ۱۰۰ تنه ملکي هیوادوال يې شهیدان او ټپیان کړل.”
مجاهد همدا رنګه خپل پیل شوي عملیات بریالي بللې او زیاته کړې یې ده چې د عملیاتو تر اوسه ۳۸ ورځې کیږي خو شپږ ولسوالۍ، قرارګاوې او ګڼې امنیتي پوستې یې له حکومت څخه نیولي دي.
د یادونې وړ ده چې افغان حکومت ډیری وخت دیته ورته ادعاوې کوي خو د طالبانو لخوا هر وخت رد شوي دي.
