پاکستان کې د پولیو مرکز سره خونړي برید لږ ترلږه ۱۵ کسان وژلي دي

کابل ټکی کام (چهارشنبه ۲۳ مرغومي ۱۳۹۴ ل) عبدالله هاشمي
د پاکستان د کوېټې په ښار کې د یوه برید په نتېجه کې لږ ترلږه ۱۵ کسان وژل شوي دي، ویل کېږي چې برید د پولیو د واکسین د مرکز سره شوی دی.
د پېښې سره سمدلاسه پولیسو سیمه په خپله ولکه کې اخیستې ده او امبیولانسونه ټپيان تر روغتون رسوي.
د پيښې زیاتره قربانیان پولیس او د روغتون ساتونکي دي.
په پاکستان کې همېشه وسله وال ساتونکي د پولیو د کارکوونکو سره یوځای ګرځي ځکه چې په دوی همېشه مرګونې حملې شوې دي.
په پاکستان کې اکثر خلک د پولیو له واکسین سره مخالفت لري او وايي چې دا دوی د ماشومانو په خلاف د کفارو یوه دسیسه ده.
د ماشومانو د ساتنې اداره دعوه کوي چې په پاکستان او افغانستان کې اوس لا هم د ګوزڼ یا پولیو مرض شتون لري.
د خلکو چیغې
سرفراز بګټي د بلوچستان صوبايي وزیر وايي: «دغه برید سهار هغه مهال ترسره شو کله چې د پولیو د واکسین کارکوونکو پدې موخه د کوېټې ښار کوڅو کې ګشت شروع کولو چې ماشومانو ته واکسین په خوله کې واچوي.»
د کوېټې ښار مرستیال کمشنر داوود غلجۍ وايې په برید کې ۱۵ کسان چې ۱۴ یې پولیس او یو لاروۍ دی وژل شوي دي او شل تنه نور ټپيان دي.
یو پولیس چې له برید څخه روغ وتلی دی وایي چې ددوی ملګرو ددې لپاره تیارۍ نیولو چې د پولیو د ټولیو سره ووځي چې برید پرې وشو.
شبیراحمد چې په خیټه، لاسونو او پښو لګېدلی دی وايي: «یو ډرز شو او وروسته چې پوه شوم په خاورو کې پروت وم او هرې خواته دود او لوګي وو، نه پوهېدم چې څه روان دي.»
دی زیاتوي: «خلکو چیغې او نارې وهلې او ورپسې د امبیولانسونو غږونه مې تر غوږ شول.»
د یادولو ده چې په تېرو څو میاشتو کې په بلوچستان کې دا ترټولو ستره خونړۍ پېښه ده.
له دې څخه مخکې د پولیو د واکسین په کارکوونکو هغه حمله د یادولو ده چې د صوابۍ په یوه علاقه کې د ۲۰۱۵ کال د نومبر په میاشت کې د پولیو یو ځایي مشر په ډزو ووژل شو.