امریکایې ولسمشر بارک اوباما د دغه هیواد ولسي استازو ته په خپلي وروستۍ کلنۍ وینا کي ویلي چي: « روان کال کي به د ګوانټانامو زندان وتړي». اوباما په لومړي ځل ټاکنیزو منډو ترړو کي هم وعده کړې وه چي که واک ته ورسید د ګوانټانامو زندان به تړي، کله چي بیا واک ته ورسید په سل ورځو کي یې د ګوانټانامو د بندولو وعده تکرار کړه، اما تراوسه چي اووه کاله تیریږي لا هم اوباما په خپله هغه لومړنۍ ژمنه عمل نه دی کړی.
د اوباما اوسنۍ ژمنه به ځکه پاموړ ارزښت ونه لري چي نوموړي مخکي په ځلونو د دغه بدنام محبس د تړلو وعده کړې او بیا خپلي ژمني ته صادق نه دی پاته شوی، نو اوس هم ښایې د اوباما د تازه ژمني په عملي کولو کلونه وخت نور هم واوړي.
کوم نظام او لیډرشیپ چي له ولس سره کړي وعدې پوره نه کړي، تر دې به نو د دوی د ناکامۍ بل لوی ثبوت چیري اوڅه وی؟ په اصل کي د اوباما د ناکامي مشرۍ یو لوی ثبوت همدغه دی چي په لومړۍ دوره کي له خلګو سره د کړو وعدو په عملي کولو آن تر اوسه چي دوهمه دوره یې پای ته نژدې ده، ونه توانید؟
لکه څنګه چي لوستونکي خبر دي د ګوانټانامو زندان د نړۍ په سطحه هغه بدنام محبس دی چي انسانان د حیوانانو غوندي قفسونو کي ساتل کیږي، داسي قفسونو کي چي سړی نه پکي سم ولاړیدلی شي اونه پکي سیده غځیدلی شي، بندیان په میاشتو میاشتو یخچال ډوله کوټو کي جزایې کیږي، لاسونو او پښو کي یې ځنځیرونه وي، د غذایې رژیم ګډوډي پکي اوج ته رسیدلې، دارو درمل او ډاکټر بیخي نشته او یا د ناروغۍ څخه څو اونۍ وروسته ممکن د دواء په نوم څه کپسولونه پیدا شي، هغه هم کله کله په داسي ډول چي بندي په کوم مرض مبتلا وي دواء بیخي د هماغه مرض لپاره نه وي، چي نتیجه کي ناروغ ته د مخکنۍ ناروغۍ سربیره د بل مرض سبب شي.
ګوانټانامو زندان کي د وهلو ټکولو ترڅنګ روحي ځور هغه ورځنۍ چاره ده چي بندیان ډير ترې ځوریږي او کړیږي، مثلا د اسلامي شعایرو سپکاوی تکراریږي، مقدساتو ته توهین کیږي، په اسلامي ثقافت ملنډي وهل کیږي، بندیانو ته په درواغو د هغوی د کورنۍ په نوم جعلي لیکونه او خبرونه ورکول کیږي او داسي نور.
ګوانټانامو محبس کي تر لسو کلونو ډیر وخت مظلوم زندانیان په داسي وحشیانه ډول وساتل شول چي نه یې د خپلي کورنۍ له کوم غړي سره ملاقات وشو، نه مدافع وکیل ورته وټاکل شو او نه هم د محاکمې له خوا په کوم جرم محکوم شول، بس د بشر دوستانو د قانون له مخي بې کناه خلګ تر یوې لسیزي ډیر وخت په دغه کرغیړن زندان کي بې برخلیکه پراته دي.
پردې سربیره کله کله امریکایې چارواکي د خلګو تیر ایستلو په موخه د مظلومو اسیرانو لپاره ځیني پوځي افسران د مدافع وکیلانو او ځیني د قاضيیانو په توګه ګوماري، همدغه په اصطلاح وکیلان او قاضیان بیا په پوځي مرکزونو کي مظلوم بندیان د محاکمې په نوم لاس وپښې تړلي په ډير بد حالت کي یوه خوا بله خوا ځغلوي، ځوروي او شکنجه کوي.
تر ډير ځنډ وروسته به هم دا د ډیري خوښۍ او خوشحالۍ خبره وي، که اوباما د ګوانټانامو د بدنام زندان د تړلو ژمنه عملي کړي؛ ځکه مظلوم اسیران به خپلو بچیانو او کورنیو ته ستانه شي او د یو ازاد انسان په توګه به د خپلو حقونو څخه برخمن شي.
د بشر د حقونو سازمانونه، ټولني او بشري فعالان نور باید د ګوانټانامو د وحشي زندان په اړه اوږده چوپتیا ماته کړي او د دغه تور زندان پرضد باید خپل اواز اوچت کړي.
