کابل ټکی کام ۱۹وږی/۱۳۹۴
راپور: قدرت الله حسین
د بدخشان ولايت د راغستان ولسوالۍ ځايي چارواکو ګواښ کړی، چې وسله والو مخالفينو په دې ولسوالۍ خپلو بريدونو ته زور ورکړی او که بېړنۍ مرسته يې ونه شي، طالبان به په ډېر لنډ وخت کې دغه ولسوالۍ ونيسي.
د راغستان امنيه قوماندان ډګروال محمد اسحاق رسنيو سره په خبرو کې ويلي دي، چې همدا اوس مهال د دې ولسوالۍ ګڼې امنيتي پوستې د طالبانو لاس ته لوېدلي دي.
وسله والو طالبانو له دې مخکې ويلي وو، چې په ياده ولسوالۍ کې يې ۵ پوستې او درې لويې سيمې خمبيل بالا، خمبيل پايان او سردشت له دولته نيولي دي.
د سيمو خلکو رسنيو ته ويلي وو، چې د طالبانو توند بريدونه لا هم روان دي او شونې ده ولسوالۍ سقوط وکړي.
امنيه قوماندان محمد اسحاق زياته کړې ده، چې د وسله والو شمېر سلګونه تنه دی، چې بهرني جنګيالي هم په کې شامل دي.
هېره دې نه وي، چې طالبانو له دې وړاندې هم په بدخشان کې بېلابېلې ولسوالۍ له دولته ونيوې او تر ډېره يې دولت د بېرته نيولو توان نه درلود.
