کابل ټکی کام ۱۹وږی/۱۳۹۴
راپور: قدرت الله حسین
د افغانستان پولې ته څېرمه په خيبر ايجنسۍ کې وسله والو کسانو د حکومت د ملاتړې امن کمېټې ۱۴ جنګيالي وژلي دي.
د قبايلي سيمې خيبر ايجنسۍ چارواکو ويلي دي، چې د ۶ نورو هغو جنګيالو مړي يې هم موندلي دي، چې په امن کمېټې پورې تړلي دي او وسله والو څو ورځې وړاندې په تېراه سيمه کې تښتولي وو.
وسله والو له دې وړاندې د دې تښتول شويو ۱۴ تنو ۹ تنه وژلي وو او وروسته يې پاتې نور هم ووژل.
سرچينو ويلي دي، چې وژل شوي ټول کسان د لنډيکوتل د بازار زخه خېل اوسېدونکي دي.
د پاکستان پوځ، ملېشې او د حکومت پلوې امن کمېټي جنګيالي له ډېر پخوا راهيسي په دغو سيمو کې د وسله والو پر ضد په جګړه بوخت دي، چې په ترڅ کې يې پر وسله والو ځمکني او هوايي دواړه بريدونه هم ترسره کېږي او د پاکستان پوځ دعوه کوي، چې درنده مرګ ژوبله وراړوي.
