عبدالحمید راشد
اسلامي حجاب هغه څه ته شامل دی، چې د ښځې ټول بدن پټ وساتي، او هغه عفیفه او پاکدامنه وساتي، همدا ډول دهغه فتنې مخنیوی وکړي، چې د حجاب په نشتون کې رامنځته کیږي.
هدف دا دی چې که چیرته د یوې ښځې بدن په داسې جامه پټ وه چې بیا ترې هم فتنه پیدا کیدله نو هغه حجاب نه شمیرل کیږي، ځکه یا به هغه لباس نری وي، یا به تنګ وي، سمه ده چې د ښځې بدن یې پټ کړی، خو بیا هم فتنه زیږوي نو دا اسلامي حجاب نه دی.
اسلامي حجاب له ګڼ شمیر مزایاوو، او صفتونو څخه برخمند دی که مراعات شي نو د هر راز فتنې مخنیوی کوي، اود یوې سمې ستره ټولنې تضمین بشریت ته کوي، هغه ټولنه چې له اخلاقي فساد څخه پاکه وي ،او ښځه پکې په ریښتیني ډول د ښځې او مور په څېر راڅرکنده شي، نه لکه د نورو د لاس اله چې اوس وخت کې يې موږ وینو.
دا چې اسلامي حجاب کوم شرطونه، صفتونه ، او مزایا لري ، په څو کرښو کې ورته اشاره کوو!
د اسلامي حجاب شرطونه اوصفتونه:
1: اسلامي حجاب هغه دی چې ټول بدن پټوي، او حتی الامکان دفتنې مخنیوی وکړي (یعنې دبدن هره برخه پټه کړي)
۲: اسلامي حجاب دی چې دبدن ټول برخه راګیره کړي ، لکه مخ لاسونه او نور ،ځکه دامت سترعلماء د مخ او ورغوو ښکاره کول هم ستر،(او دفتنې پیدا کوونکي) بولي او د تقوا خبره هم دا ده ، چې باید مخ او ټول بدن پټ کړای شي.
دا چې جذاب او نظر جذبونکی دې نه وي، او له زینت څخه دې هم خالي وي، ځکه دا ډول حجاب د خلکو پام ځانته راړوي.
3 : اسلامي حجاب هغه دی چې په عادي حالتو کې ترې ، دښځې دبدن هیڅ برخه پکې ښکاره نه شي، مګر بعضې جزیات بېل دي لکه د ښځې لوېدل یا ورته موه حادثه پېښېدل.
4: اسلامي حجاب تنګ او چسپ نه وي، ځکه دحجاب تنګوالی او چسپوالی هم د فتنې سبب کیږي، ځکه رسول الله ص فرمایي: رب کاسیات عاریات(ډير کله هغه ښځې او نجونې چې جامه یې اغوستې وي هغه بربنډې وي، ځکه هغه بیا معبر وي دبدن) او همدې تنګوالي سره د بدن د اعضاوو ښکارندويي کوي او دشهوت پارونه کوي.
5 : اسلامي حجاب پاک وي، پداسې شکل چې عطر به یې پرې نه وي لګولي، ځکه دښځې لپاره په عامه لارو کې عطر لګول د حجاب هدف له منځه وړي ، او دخلکو فکر ځانته راړوي، چې دا بیا د فتنې سبب کیږي
۶: اسلامي حجاب بد بوی هم نلري، ځکه دا هم ښځو ته دخلکو فکر راوړي او دحجاب یو ډول توهین او سپکاوي ته دخلکو پام راړوي، او اسلام هم په پاکوالي باندې په هر ځای کې امر کړی ، او حجاب باید په حتمي او لازمي ډول ځکه پاک وي، چې تل د ښځې له بدن سره پیوسته وي،او د ناپاکۍ په صورت کې یې نورو خویندو او وګړو ته هم اذیت وي.
۷: اسلامي حجاب کې له سړو سره مشابهت نه وي، ځکه رسول الله صلی الله علیه وسلم، په هغو ښځو لعنت ویلی ،چې په پوشاک کې له نارینه سره ورته والی کوي.
8 : اسلامي حجاب کې له کافرو،فاسقو، نجونو سره هم فرق کیږي، ځکه رسول الله ص فرمایي: د یهودیانو او مشرکینو مخالفت وکړئ، او همدا ډول د دوی حجاب په اکثره وخت کې له اسلامي شریعت سره په ټکر کې وي.
۹: اسلامي حجاب کې شهرت نه وي مطلوب ، په داسې ډول چې ډېر قمیتي، او یا داسې چې په ښځو کې غیر سالم رقابت ته لاره هواره کړي
۱۰: حجاب باید ډیر ازاد هم نه وي، ځکه د دې ژغورل بیا له پلیتو څخه سختیږي، او په عامه توګه په خلکو کې له حجابه کرکه هم پیدا کوي، بلکې حجاب باید په متوسط پراخوالی ولري.
دا چې د اسلامي حجاب اهمیت څه دی په لاندې کرښو کې ورته اشاره کوو:
1 د اسلامي حجاب په مراعت سره د سړو او ښځو زړونه، د شیطان له وسوسو، اوشیطاني افکارو څخه په کلي ډول پاکیږي.
2 اسلامي حجاب د مسلمانې ښځې د عفت او پاکدامنۍ ښکارندويي کوي.
3 اسلامي حجاب په ښځو باندې دتهمت مخنیوی کوي.
4 اسلامي حجاب د مسلمانې ښځې ساتنه او هغوی ته د خلکو د نظر مخنیوی له ضعیف الایمان، او ناهله نارینوو څخه کوي.
5 اسلامي حجاب د خاوند،محارمو، او نورو خپلوانو او ښځې ترمنځ د تهمت بدبیني فضا له منځه وړي، او پر ځای د مینې محبت، ریښې ټینګې، او د قوي رابطې جرړې قوي کوي.
نو دا هغه د اسلامي حجاب مواصفات دي چې احادیثو او تفاسیرو کې ورته اشاره شوې وه، اوس وخت کې هغه حجابونه چې په خلکو کې دود دي، او دا صفات پکې نه وي ، نو دا په کل کې هغه حجاب نه دی چې شریعت موږ ته راښودلی، نو که د اسلامي حجاب صفات په حجاب کې موجود نه وه ، اوفتنه موجوده شوه، نو شریعت بیا له دغه فتنې څخه بري دی، ځکه شریعت خو تاته پولې روښانه کړې وې، نو تا پرې عمل نه و کړی.
نو هيله ده چې د اسلامي حجاب ځانګړتیاوې په حجاب کې مراعت شي، او که دا مراعت نشي، نو بیا ستا اغوستی لباس اسلامي حجاب نه، بلکې عرفي او رواجي حجاب دی.
په اخره کې د خویندو او پلرونو، څخه هيله کوم چې کله حجاب پېري ،نو باید د اسلامي حجاب دغه صفتونو ته پکې پام وکړي ، څو اسلامي پولې په دقیق ډول عملي شي.
دا چې غرب ولې د اسلامي حجاب حجاب مخنیوی کوي پر دې مسئله بیا بحث کوو
له اخلاقي فساد څخه د پاکې ټولنې په هيله!
