کابل ټکی کام ۱۹وږی/۱۳۹۴
راپور: قدرت الله حسین
د ننګرهار ولايت د پچير اګام ولسوالۍ اوسېدونکي وايي، یوې فتنه اچوونکې وسله والې ډلې په دې ولسوالۍ کې ۸ تنه ولسي وګړي وژلي دي، چې ټول کوچنيان او مېرمنې دي.
خلکو ويلی، چې دې مشهورې فتنه اچوونکې ډلې د دې خلکو کورونه هم په اور سوزولي دي او د هغوی شتمنۍ يې اخستې دي، او خلک له سيمې وتو ته نه پرېږدي.
د خوږياڼو سراسري شورا دغه پېښه تاييد کړې ده او زياته کړې يې ده، چې د تېرو ورځو په اوږدو کې داعش وسله والو د ۴ او ۷ کلونو تر منځ ۴ کوچنيان او درې مېرمنې شهيدان کړي دي.
د يادې شورا خبرپاڼې ليکلي دي، چې داعش له دې پرته د ۱۵ برمته کړو وګړو ۴ تنه يې هم په ډېر وحشت وژلي، چې ټول ولسي خلک دي او په کوم سياسي لوري پورې تړلي نه دي.
شوری پر حکومت غږ کړی، چې د روان ناورين مخنيوی دې وکړي او په دې لاره کې دې جدي ګامونه پورته کړي.
ياده دې وي، چې داعش وسله والو وړمه ورځ د همدې ولايت په چپرهار ولسوالۍ کې هم د خلکو عامه وژنه کړې وه، چې له امله يې لسګونو ولسي وګړو ته مرګ ژوبله اوښتې وه.
