کابل ټکی کام (دوشنبه، مرغومی ۲۸مه، ۱۳۹۴ ل):
په کابل کې د افغانستان ، پاکستان، امریکا او چین د استازو څلور اړخیزه غونډه نن شاوخوا ۱۲ بجې د بهرنیو چارو د وزیر صلاح الدین رباني په وینا پيل شوه چې اوس هم روانه ده او ټاکل شوې ده، چې څلور واړه خواوې د سولې په هغه نقشه خبرې وکړي، چې له مخې به یې د افغان حکومت له ټولو مخالفو ډلو سره د سولې خبرې وشي .
د اجراییه ریاست ویاند وايي چې په دې ناستو کې د سولې پر کړنلاره بحث کېږي اوکه پایلې مثبتې راووتې نو همدې تګلارې ته به ادامه ورکوي او کنه بیا باید پرې له سره غور وشي. د راپورونو له مخې د اجراييه ریاست ویاند دا هم وويل، چې دوی ته به په دې ناسته کې پاکستان د هغو طالبانو لیست ورکړي چې د سولې مخالف دي او په وينا يې دوی به يې پر وړاندې د جګړې لاره اختیاروي .
نن سیمه یزو رسنیو ويلي، د نن ورځې څلور اړخيزه غونډه كې به د پاكستان د بهرنيو چارو وزارت مرستيال اعزاز چوهدري، د افغانستان مرستيال خارجه وزير حكمت كرزى، د پاكستان او افغانستان لپاره د امريكا خاص استازى ريچارډ اولسن او د چين خاص استازى سان يوژي ګډون ولري . د یادونې وړ ده چې طالبانو تر اوسه ددې څلوراړخیزې غونډې په اړه کومه تبصره نه ده کړې.
سلیم بریال
