(کابل ټکی کام، ۱۳۹۸، تله ۸، دوشنبه)
د تخار ولایت په مرکز او بهارک ولسوالۍ طالبانو بریدونه پيل کړي چې د ځايي سرچينو په وينا لا هم جګړه روانه ده او په عین حال کې په سیمه کې په محلي پوليسو هوايي برید هم ترسره شوی چې لسګونه تنو يې مرګ ژوبله اړولې ده.
د تخار مرکز تالقان ښار په غرب کې د نواباد ابدال سيمه کې طالبانو جګړه پل کړې او ځينې سیمې يې نيولي دي.
همداراز په بهارک ولسوالۍ کې هم طالبانو پر ولسوالۍ او شاوخوا پوستو جګړه پيل کړې او په عین حال کې باوري سرچينې وايي، چې افغان هوايي ځواکونو پر محلي پوليسو هوايي بريد کړی چې اووه تنه پکې وژل شوي او شاوخوا شل تنه نور ټپيان دي.
راپور زیاتوي، تالقان ښار ته د تګ راتګ لارې تړلي او په ښار کې ډيری هټۍ بندې دي.
د محلي پوليسو مشري داود بهارکی، کریم الله او قومندان خليل کوي چې له حکومت څخه يې د کومکي ځواکونو د مرستې غوښتنه کړې خو تر اوسه ځایي چارواکو په دې اړه څه نه دي ويلي.
دا لومړی ځل نه دی چې حکومي هوایي ځواکونه پوليس بمباروي بلکې تر دې مخکې هم بهرنیو او دولتي هوایي ځواکونو په هوايي بريدونو کې ملي اردو، پوليس او کوماندو ځواکونه هدف ګرځولي چې هغوی ته پکې درنه مرګ زوبله اوښتې ده.
