طالبانو د نورستان وانټ وایګل کې ۱۴کیلو متره سړک جوړ کړی

کابل ټکی کام ۰۳سلواغې/۱۳۹۴، احمدالله مهاجر
طالبانو له کوم وخت څخه چې د نورستان ولایت وانټ وایګل ولسوالۍ نیولې ده په هغو پروژو کار پیل کړی چې عوام ورته اشد ضرورت لري.
د طالبانو له لوري مونږ ته را لېږل شوي پیغام کې ویل شوي دي چې په دغه پروژه کې د یو شمېر لارو او پلونو جوړول شامل دي.
په پيغام کې د یادې پروژې لومړۍ مرحله له دبیلي کلي څخه نیولې تر آرنس کلي پورې د ۱۴کیلو متره سړک جوړول ښودل شوې ده.
پیغام کاږي چې یاد سړک اوسمهال د ګټې اخیستو لپاره چمتو شوی او په پوره مانا او ښه کیفیت یې د جوړېدو کار سرته رسېدلی.
پیغام وايي، اوسمهال له وایګل کلي نیولې تر بیلي کلي پورې پر غزېدلې لارې او څو لویو پلونو باندې کار روان دی.
پیغام د سیمې څخه د یوه همکار له قوله لیکلي چې په دې سیمه کې له ۱۴کلونو را هیسې د کابل ادارې د یوې افغانۍ په قدر کار هم نه دی کړی، چې اوس یې د دوی له لوري بیا له سره ترمیم کیږي.
پیغام زیاته کړې ده چې د یادې ولسوالۍ خلک د دوی د جنګیالیو له ښه سلوک او پر عام المنفعه ځایونو د کار کولو څخه ډېر خوښ دي، او خلکو هم ور سره د ملاتړ غږ پورته کړی دی.
د یادولو ده، طالبانو وړاندې هم په بغلان ولایت کې د ځايي خلکو په مرسته په سړک کار پیل کړی وو، او اوس یې هم په ځینو سیمو کې دا لړۍ ساتلې ده.