څارنوال حشمت عبیدي
د اسلامي امت د رشیدو زامنو له ویاړمنو کړنو څخه ؛
۱: په قطرکې د «خالد بن وليد» په نوم د ترکیې نوې پوځي اډې پرانستې لپاره چمتووالی بشپړ شوی دی.
د ترکيې ولسمشر رجب طيب اردوغان په قطر کې د خالد بن وليد پوځي اډې د جوړېدو له چارو د لیدنې لپاره د دوشنبې په ورځ هغه هېواد ته سفرکړی ؤ.
اردوغان د خپلو خبرو په ترځ کې ویلي چې ترکیه د قطر د سختې ورځې ملګرې ده او هیڅوک دې د دوی له موجودیت څخه نه ویریږي.
اردوغان زياته کړې چې دغه اډه د نورو په څېر د شخصي ګټو پر بنسټ نه ده جوړه شوې او دغه اډه به نه یوازې د ترکیې او قطر، بلکې د ټول خليج د امنيت لپاره اغیزمنه او ګټوره ثابته شي، او دغه پوځي اډه کولی شي چې د قطر او ورسره نورو هېوادونو امنيت خوندي کړي.
نوموړي زیاته کړې، چې له همدې امله یې دغې اډې ته د ستر صحابي او عرب نوميالي «خالد بن وليد» نوم ورکړی.
په ورته وخت کې د قطر واکمن دغه هیواد ته د اردوغان سفر د ټول خلیج په ګټه بللی دی او دا يې د سیمې او خصوصاً د عربو او ترکيې د اړيکو لپاره اړين ګام بللی او ويلي يې دي چې د دې پوځي اډې پواسطه به په سیمه کې امنيت راشي.
۲ : د ماليزیا، ترکيې، اندونیزيا، قطر او پاکستان پنځه هېوادیز دفاعي تړون، د ښاغلي اردوغان او مهاتير بن محمد بله هغه د افتخار وړ کړنه ده؛ چې امت پرې وياړي.اسلامي امت اوس د اردوغان ، مهاتير ، تميم ، راشد الغنوشي او قيس سعيد په څېر ځیرکو سياستوالو او مشرانو ته سترګې په لار دي؛ که څه هم ځينې لنډ فهمي مسلمانان يې مجبوريتونه نه پېژني او له دوی څخه پداسې شرايطو کې هم د راشدينو خليفه ګانو خلافتونه غواړي، په داسې حال کې دا يوويشتم قرن دی او په اوس وخت کې دومره هم ډېر دي چې ټول مسلمانان په محکوم حالت کې واقع دي او دوی داسې تړونونه کوي چې د مسلمانانو په ګټه وي.
