سرليکنه
تېره ورځ ترکیه د اسلامي هېوادونو د یووالي او انسجام لپاره د اسلامي هېوادونو د همکارۍ سازمان غړو هېوادونو د هلو ځلو د یوې پرتمینې غونډې کوربه وه چې د ملیاردونو مسلمانانو تازه هېلې یې راټوکولې دي او د دې غونډې مورال هغه مهال لا پیاوړتیا پیدا کړه چې ترکي ولسمشر ګډونوالو ته د زړه له کومې وینا وکړه او د ګډون والو پر زړونو یې د جادو په څېر اغیز پریویست.
ترکي ولسمشر اردوغان د اسلامي همکارۍ د غړيو هېوادونو د مشرانو په غونډه کې وويل، چې موږ بايد په اسلامي نړۍ کې خپل قوتونه سره يو ځای کړو او ترکيه چمتو ده، چې په دې اړه له اسلامي هېوادونو سره خپلې تجربې شريکې کړي.
زموږ اساسي هدف د ټولو مسلمانانو ستونزې حل کول دي، که د اسلامي نړۍ په هر ګوټ کې وي.
۲۱ سلنه مسلمانان يعنې زموږ ۳۵۰ ميليونه وروڼه د فقر تر کچې ښکته ژوند کوي. د مسلمانانو د بډايو هېوادونو او بې وزلو هېوادونو ترمنځ ډېر زيات توپيرونه دي او که ټول مسلمانان خپل زکاتونه ورکړي، په اسلامي نړۍ کې به هېڅ بې وزله مسلمان پاتې نه شي.
د مسلمانانو بډايه دولتونه بايد له نورو بې وزلو هېوادونو سره خپلې مرستې او تجربې شريکې کړي، تر څو د اسلامي هېوادونو کمزوری اقتصاد پرمختګ وکړي.
موږ ټول بايد خپلې ستونزې له هر ډول پيچلتيا او بدګومانيو پرته وڅېړو او ټول مسلمانان بايد اسلامي نړۍ ته د ورپېښو ګواښونو او ننګونو د مخنيوي لپاره په شريکه هلې ځلې وکړو.
