کابل ټکی کام (دوشنبه، ۳ زمری، ۱۴۰۱ل)
د راپورونو له مخې، تېره ورځ د ازبکستان او افغانستان چارواکو ترمنځ د ترمذ-مزارشریف-کابل-پېښور د رېل پټلۍ د چارو پر عملي پيل خبرې شوي دي.
د افغانستان د بهرنيو چارو وزارت مرستيال وياند حافظ ضياء احمد وايي، چې تېر ماښام د ا. ا. ا. د بهرنیو چارو وزیر په مشرۍ د افغان پلاوي په ویاړ د ازبکستان د ملي امنیت شورا مرستیال او په بهرني سیاست کې د ولسمشر د ځانګړي استازي عبدالعزیز کاملوف له خوا د ماښامنۍ تابیا شوې وه.
نوموړی زياتوي، په دې ماښامنۍ کې د افغانستان لپاره د ازبکستان د ولسمشر ځانګړي استازي عصمت الله ایرګاشوف او د بهرنیو چارو وزارت چارواکو ګډون درلود.
ضياء احمد په خپل رسمي ټويټر پاڼه ليکلي، چې په دې ناسته کې د افغانستان له خوا د بهرنیو چارو وزیر تر څنګ، د ماليې وزیر ملا هدایت الله بدري او د افغانستان په اړه د تاشکند نړیوال کانفرانس کې ګډون کوونکي پلاوي شرکت کړی و.
راپور کې راغلي، چې په مجلس کې د بهرنیو چارو وزیر او کاملوف ترمنځ د افغانستان او ازبکستان ترمنځ پر ځینو مهمو زیربنايي پروژو هراړخیزې خبرې شوي زياتوي:«د خبرو اصلي محورونه د ترمذ-مزارشریف-کابل-پېښور د رېل پټلۍ د ساحې سروې او د چارو عملي پيل وو.»
