کابل ټکی کام (یکشنبه، ۱۰ تله، ۱۴۰۱ل)
د افغانستان د وزلوبې فدراسیون وايي، په ترکیه کې په نړیوالو سیالیو کې د وزلوبې افغان لوبغاړي له ستونزو سره مخ شوي او سیالۍ یې ځنډېدلې دي.
دا د سيمې په کچه د وزلوبې نړيوالې سيالۍ دي چې د دې فدراسیون فني مرستیال خیر محمد سنچارکي په وينا، د دوی ټیم د لوبو لپاره چمتوالی لري خو د کافي او چابکو اسونو د نشتون له امله یې تر اوسه یوه لوبه هم نه ده کړې چې له امله یې سیالۍ ځنډېدلې دي.
د سنچارکي په خبره: “څلور ورځې کېږي چې دلته سیالۍ پیل شوي. د مهالوېش له مخې موږ د ترکیې او مجارستان لوبډلو سره لوبې لرو چې تېره ورځ باید شوې وای، خو دوی موږ ته چابک اسونه نه دي اماده کړي، یوازې څلور اسونه یې اماده کړي، چې هغه هم د استفادې وړ نه وو.”
د افغانستان د وزلوبې فدراسیون مسوولان وايي، په دغه سیالیو کې د افغانستان د وزلوبې ۱۲ غوره لوبغاړو برخه اخيستې ده.
په عين حال کې د افغانستان د رسنيو برخې غړی نعيم پرهيز په دغه سياليو کې د ستونزو پيدا کيدل مني په خبره يې: “د افغانستان او یو شمېر نورو اسیايي هېوادونو لپاره د دې سیالیو د تنظیمونکو لخوا اسونه په اختیار کې ورنه کړل شول، همدغه دلیل و چې افغان لوبغاړي ونه توانېدل چې په دې سیالیو کې لوبه وکړي، خو هیله مندي شته چې د دې سیالیو د تنظیمونکو لخوا دغه ستونزې حل شي.”
د فدراسيون د معلوماتو پر بنسټ، دغه سیمه ییزي لوبې په ترکیه کې د شاوخوا ۱۰۰ هېوادونو د استازو په ګډون په بېلابېلو برخو کې جوړې شوي چې له افغانستان نه د وزلوبې، کورش او رستمي غېږنیونې په برخه کې لوبغاړو ګډون کړی دی.
