په امریکا کې یو سپین پوستي عیسايي ترورېست یو افغان په بېلچه وواژه

کابل ټکی کام ۲۴سلواغه/۱۳۹۴، فرید احمد
د امریکا ولسمشر که څه هم څو ورځې وړاندې وویل چې «پر اسلام برید په ټولو ادیانو برید دی» خو د ده دا خبره هسې د خولې خبره ده، ځکه په امریکا کې پر مسلمانانو او د دوی پر مقدساتو چې څومره تېری کیږي، د اوباما له یادې خبرې سره په پوره مانا ټکر لري.
دادی نن هم یوځل بیا د امریکا په پورټلنډ ښار کې یو افغانۍ (عبدالجمیل کامه وال) د یوه سپین پوستي ۲۷ کلن امریکایي له خوا د بېلچې په مټ په ډېره بې رحمۍ سره وژل شوی دی.
نوموړی چې په یاد ښار کې د مسلمانانو خدمتګار وو، یوازېنۍ ګناه یې دا وه چې د مسلمانانو جوماتونو ته یې چندې کولې او خلک یې دین ته رابلل، او همدا شان نوموړي د ننګرهار ولایت په کامه کې چې د ده اصلي استوګن ځای وو، هم له خلکو سره د زدکړو او د نورو خوراکي توکو په برخه کې مرستې کړي دي.
که څه هم امریکايي رسنیو د پېښې خبر ورکړ خو یوازې دومره یې وویل چې قاتل یو سپين پوستۍ ۲۷ کلن امریکايي دی، هغه یې د نورو پېښو برخلاف یو ترورېست اعلان نه کړ، ځکه که چېرې په یوه پېښه کې یو کس ترورېست اعلان شي نو د پېښې د څېړلو لپاره به فنډ بیلیږي ترڅو د پېښې عاملین پیدا کړي، خو دا چې دا پېښه د مسلمان پر ضد یو عیسايي کړې ده، هغه یو عام قاتل اعلان کړ او پېښه به همداسې پاتې شي.