کابل ټکي کام د حماس اسلامي غورځنګ او اسرائيلي نيواکګرو ترمنځ غزه کې د روانې جګړې په هکله د مشهور فلسطيني ليکوال، ژوناليست او د منځني ختيځ د چارو له څېرونکي ښاغلي “ابراهيم المدهون سره ځانګړې مرکه کړې، چې ژباړل شوې بڼه يې له تاسو سره شريکوو:
پوښتنه :
دا به په ځای وي چې داقصی طوفان له پیلولو مخکې به مو دټولو هغو زیانونو، تلفاتو اواسرائیلي ظلمونو وړاندوینه کړې او یا سنجولې وي چې په غزه کې پېښ شول ؟!
ځواب:
له شک پرته د جهاد لاره سخته ده، خو په دغه لار له تګ پرته بل اختيار نشته، حماس د جهاد شعار پورته کړی او د الله تعالی په لاره کې شهادت زموږ ستره ارزو ده. طبعي ده، چې دا هر څه سنحول شوي و. په دغه جګړه کې د امريکا په دغومره پراخې کچې ښکېکلتيا، چې جنګۍ بيړۍ، طياره وړونکې بيړۍ او ډول ډول وسايل يې راوړي، ددې ښکارندويي کوي، چې امريکا او اسرائيل يوه پروژه ده، که څه هم دوی دغه خبره پټوله وه، خو طوفان الاقصی عملياتو جوته کړه، چې اسرائيل په سيمه کې د امريکا متحده ايالاتو لپاره د الوتکو ځمکنۍ اډه ده.
د طوفان الاقصی عملياتو په پيل کې د اسرائيلو نظامي ځواک ونړېد، که چېرته امريکا په بيړه او دومره ستر ځواک سره مداخله نه وی کړې، د اسرئيلو ماته يقيني وه، اوس هم اسرائيل او امريکا زموږ د ملت ماتولو کې ناکام دي، هغوی يوازې په ۲۰۰۱م کال کې د افغانستان د اشغال پرمهال جنګي جرمونو او وحشتونو په څېر جنايات ترسره کوي.
پوښتنه :
داسې معلومیږي چې د اقصی طوفان عملیاتو له پیل مخکې مو د عملیاتو د دومره اوږدېدلو تیاری لا له وړاندې نیولی و دا سمه ده ؟!
ځواب:
هو، د الله تعالی د دغه حکم، چې کافرانو سره د مقابلې لپاره تر خپله وسه پوره تياری وکړئ، موږ چمتوالی نيولی و، دې خبرې ته په کتو چې غزه کلابنده ده، مساحت يې لږ دی او هر چېرته دښمن شتون لري، دا چمتوالی ډېر کم و؛ خو الله تعالی په کې ځکه برکت کېښود، چې د هغه جل جلاله له امر سره سم و.
پوښتنه:
داقصی طوفان عملیاتو پيل ولې د اکتوبر په اوومه ۷ ؟ که په دې اړه تفصیل ووایاست !
ځواب:
دغو عملياتو ته له تېرو دوه کلونو چتموالی نيول شوی و، دغه تياری هغه مهال پيل شو، چې په ۲۰۲۱ م کال کې اسرائيلي نيواکګرو په مسجد اقصی تيری وکړ، هغه مهال اسرائيلو کلکه اراده کړې وه، چې مسحد به نړوي، په ځای به يې ګماني/مزعوم هيکل رغوي او مسلمانان به له قدس ښار څخه وتلو ته اړباسي.
هغه مهال د حماس اسلامي غورځنګ مشرانو لوړه وکړه، چې تر څو دوی ژوندي وي، اسرائيل به د جومات نړولو ته پرېنږدي، له هماغه وخته يې طوفان الاقصی عملياتو ته تياری پيل کړ، پټنځايونه او تونلونه يې جوړ کړل، اسلحه او تجهيزات يې چمتو کړل او ځانګړو عسکرو ته يې روزنه ورکړه.
د عملياتو د پيل لپاره يې دغه ورځ ځکه غوره کړه، چې په دې ورځ د اسرائيلو د ميلې او جشن ورځ وه، د حماس مجاهدين د الله تعالی ددغه قول (ادْخُلُوا عَلَيْهِمُ الْبَابَ فَإِذَا دَخَلْتُمُوهُ فَإِنَّكُمْ غَالِبُونَ وَعَلَى اللَّهِ فَتَوَكَّلُوا إِنْ كُنْتُمْ مُؤْمِنِينَ) سره سم پرې له دروازو ورغلل، په دې توګه د اسرائيلو استخباراتي شبکې ته دوکه ورکړل شوه له توقع پورته ګزار سره مخ شول.
پوښتنه:
ستاسو ( حماس) او حزب الله اهداف یو بللی شو؟
ځواب:
زموږ هدف د الله تعالی د دين لوړوالی او له اسرائيلي اشغال څخه د فلسطين ازادي ده، هر څوک چې په دې برخه کې زموږ مرسته کوي، موږ ترې مننه کوو. څوک چې د اسرائيلو پر وړاندې جګړه کوي، موږ يې قدرداني کوو. اسرائيلو د ټولو مسلمانانو او د سيمې د ټولو اوسېدونکو ضد دي.
پوښتنه: هغو سختو شپو ورځو ته په کتو چې په تاسو تېرې شوې یاتیریږي؛ هغه به کوم اسلامي هیواد وي چې تاسې یې د غزې په اړه له دریځه راضي یاست ؟ لومړی، دویم او دریم کوم کوم هیوادونه دي ؟!!
ځواب:
په دې برخه کې ټول هيوادونه په خپل مسؤليت کې پاتې راغلي او دريځ یې کمزوری دی، د غزې جګړه اسلامي جګړه ده، خو ټولو هيوادونو غزه يوازې پرېښې ده، غزه په يوازې ځان جګړه کوي. نن ورځ په غزه خوراک، څښاک، برېښنا او تيل نشته؛ خو د اسلامي نړۍ او عربي هيوادونه د زيات خوراک او څښاک له وجې په ناروغيو اخته دي، ټول په خپل مسؤليت کې پاتې راغلي دي. د شرم يو لوی احساس موجود دی او موږ ته د نبي کریم صلی الله عليه وسلم حديث ياديږي، چې فرمايي: زما د امت يوه ډله به هميشه په حق باندې وي، په دښمن به غالبه وي، دوی ته به هيڅوک ضرر نشی رسولی، مګر هغه چې الله تعالی يې ورته د رسولو اراده کړې وي، تر دې چې د الله تعالی امر راشي. او نبي کریم صلی الله عليه وسلم فرمايي چې دغه ډله به په بيت المقدس کې وي.
د غزې حالت د ټولو مسلمانانو لپاره پيغور او سپکوالی دی؛ خو ژر به الله تعالی خپل نصرت رانازل کړي، د ا د غزې د خلکو باور او عقيده ده.
پوښتنه:
له اسرائیلو سره مذاکراتو ته به په کومو شرایطو تیار شئ ؟!
ځواب: د حماس او اسرائيلي اشغالګرو ترمنځ مخامخ خبرې نشته، البته ځينې دريمګړي جهتونه شته. د حماس غوښتنې او شرطونه څرګند دي، هغوی غواړي، چې ظلم پای ته ورسيږي، اسرائيلي اشغالګر ووځي، د غزې کلابندي پای ته ورسيږي، په مسجد اقصی تيری بند شي، د غزې له خلکو سره بشري مرستې وشي او موږ دې په خپله خاوره او خپله سيمه کې ژوند کولو ته پرېښودل شو.
پوښتنه :
تاسې د حماس د ویاند او د صحنې د شاهد په حیث به د غزې د اوسیدونکو حالت نورومسلمانانو ته څه ډول انځور کړئ ؟!
ځواب:
زه د حماس وياند نه يم، بلکې ليکوال اوسياسي شنونکی يم، د خپل ملت هيلې او د جهاد او مقاومت ارزوګانې تعبيروم او د خپل فلسطيني ملت پيغام نړۍ او مسلمانانو ته رسوم.
د غزې خلک په ډېر سخت حالت او لوی امتحان کې دي، له بې ساري ظلم سره مخ دي، د غزې خلک له قتل، ړندوبمباريو، د وادنيو ړنګېدلو، د سيمې پرېښودلو، لوږې او تندې نه رنځ وړي، هر لورته وحشت، لوږه، تنده او ظلم خپور دی؛ خو له دې ټولو سره سره د غزې اوسېدونکي دالله تعالی په دين منګولې خښوونکي دي، په خپل حق دريځ ولاړ دي او د الله تعالی په نصرت او مرسته باور او عقيده لري.
