له ټاکنو وروسته د امريکا بهرنۍ تګلاره څنګه ښکاري؟

د امريکا د ۲۰۲۴ م کال ولسمشريزې ټاکنې،چې د ددوو سرسختو سيالانو د جمهوري غوښتونکو ګوند د نوماند ډونالډ ټرمپ او د ډيموکراټ ګونډ نوماندې کاملا هرېس تر منځ تر سره شوې، د ټاکنیزو کمپاینونو پر مهال د امریکا د ولسمشرۍ د نوماندانو شعارونه تر ډېره د روسیې او اوکراین، د اسرائیلو او غزې ترمنځ جګړې او له افغانستانه د امریکا د وتلو په څېر موضوعاتو متمرکز وو. خو وبه ليدل شي، چې د ټاکنو پايلې به د نړۍ پر اوسني وضعيت په ځانګړې توګه د منځني ختيځ پر کړکېچ، د روسيې او اوکراين تر منځ جګړه، په سيمه کې د چين ډېرېدونکی نفوس او د افغانستان پر اوسني وضعيت کومه بنسټيزه اغېزه ولري، په دې اړه ټرمپ او هرېس په نړۍ کې د امريکا د رول په اړه خپل بېلا بېل نظرونه ښودلي، نو له ټاکنو وروسته د امريکا بهرنۍ سياست څه ډول وي، د اکتوبر پر ۷مه د حماس له بريدونو راهيسې کاملا هرېس تر ډېره بريده د بايډن د ادارې دريځ تآييد کړی، داسې چې اسرائيل د خپل ځان د دفاع حق لري، خو په سيمه کې له شريکانو سره د اوربند راتلو لپاره کار کوي، د اسرائيلو پر بشپړ ملاتړ سربېره هرېس غزه کې د ملکي وګړو د ساتنې اړتيا په اړه د بايډن پرتله ډېره صريحه ده، په تېر جولای کې واشنګټن ته د اسرائيلو د لومړي وزير بنيامين نتنياهو د سفر پر مهال هرېس کانګرېس ته د هغه له امله ګډون نه و کړی او وروسته په يوه خصوصي غونډه کې نوموړې سختې خبرې وکړې او ويې ويل چې غزه کې به جګړه پای ته ورسېږي، غزه کې د جګړې له پيلېدو وروسته امريکا کې د اسرائيلو په اړه د بايډن د تګلارو پر ضد پراخ لاريونونه وشول، لکه څنګه چې يو شمېر لاريونوالو غوښتنه کوله چې هرېس د اسرائیلو د وسلو د بنديز ملاتړ نه دی کړی، خو ډونالډ ټرمپ د اسرائیلو ملاتړ لومړيتوب ښودلی او له تل ابيب نه بيت المقدس ته د امريکا د سفارت د لېږدولو پرېکړه او د ابراهم هوکړه يادوي، چې د اسرائیلو او ځينو عربي هېوادونو تر منځ يې اړيکې عادي کړې دي، د ټرمپ دويمه دوره د پخوا په څېر تګلارو د دوام ورکولو په معنی کېدای شي، ټرمپ په خپل ټاکنيز کمپاين کې وويل، چې د اسرائيلو د حق ملاتړ به وکړم، چې د ترهګرۍ پر وړاندې جګړه وګټي او دوی بايد د جګړې ګټلو حق ولري، په هر حال په تېرو درېوو کلونو کې چې روسيې پر اوکراين يرغل کړی امريکا په مستقيم ډول له کيف سره څه باندې ۹۰ ميليارډه ډالره مرسته کړې ده، ډونالډ ټرمپ ادعا کوي، چې يوازې په ۲۴ ساعتونو کې د اوکراين جګړه ختمولای شي، خو د دې کار پر څرنګوالي يې ښکاره جزئيات ورنه کړل، په نوماندۍ کې د هغه ملګري استدلال کړی، چې امريکا د جګړې پر هڅو خورا ډېر لګښت کوي، هغه پر دې باور دی، چې اوکراين به له روسيې سره د سولې پر خبرو تمرکز وکړي او دا ومني چې د ټولې خاورې بېرته نيول ممکن نه دي، دغه راز ټرمپ هم پر ناټو نيوکه کړې او ويلي يې دي، چې امريکا ښايي د هغو متحدينو دفاع ونه کړي، چې په دفاع کې کافي لګښت نه کوي، بله خوا کاملا هرېس د بايډن چلند ته د دوام ورکولو ژمنه کړې، نوموړې ناټو د نړۍ له ټولو ستره پوځي ټلواله بللې او پر روسيې د بنديزونو د فشار تر څنګ له اوکراين سره پوځي، اقتصادي او سياسي مرستې کوي، په دې وروستيو کې هغې پر ټرمپ نيوکه وکړه، چې دوی د اوکراين مسئلې په اړه د سولې وړانديز نه کوي، بلکې دا د تسليمۍ وړانديز دی، د چين د مسئلې په اړه بيا د دواړو ګوندونو تر منځ ځينې مشابه ټکي تر سترګو شول، دواړه خواوې په زياتېدونکي توګه چين ته د يو مهم ستراتېژيک سيال په توګه ګوري،ځکه چين د امريکا ګټو ته يو احتمالي ګواښ دی او امريکا په ټوله نړۍ کې د چين د نفوس په اړه اندېښمنه ده، خو ټرمپ ښايي د چين پر وړاندې سخت دريځ غوره کړي او په راتلونکې کې له چين سره په مستقيمه توګه سوداګريزه جګړه پيل کړي.
له پورتنيو مواردو داسې ښکاري،چې د ټرمپ په بریالي‌کېدو سره له اسرائیلو څخه د ډونالډ ټرمپ د ملاتړ له امله غزه کې جګړه لا زور واخلي، پر فلسطيني وګړو به ظلم او زورياتی دوه برابره ډېر شي، ځکه د اسرائيلو پلازمېنه اورشلم همدې ټرمپ جوړه کړه،خو د روسيې په اړه د نوموړي د نرم دریځ له امله به د اوکراین جګړې د پای ته رسېدو لپاره خبرو ته زمینه برابره شي.
که ټرمپ يو ځل بيا واک ته ورسېږي،ښايي یوه اندازه اقتصادي فشارونه پر افغانستان راولي، يعنې هغه پیسې،چې د ملګرو ملتونو له لوري افغانستان ته راځي، امریکا يې بندې کړي، خو اصلي خبره زموږ ده، چې په راتلونکې کې د امريکا هر ولسمشر بايد د افغانستان په اړه رښتينی نظر ښکاره کړي، ځکه اسلامي امارت د امريکا په ګډون د نړۍ له ټولو هېوادونو سره ښې اړیکې غواړي، له همدې امله افغان ولس ته دا ډېره مهمه مسئله ده، چې امريکا کې هر څوک واک ته رسېږي، د افغانستان پر وړاندې بايد رښتینی سیاست ولوبوي او د تېر په څېر د خپلو شخصي ګټو د ترلاسه کولو لپاره په يوه او بله بهانه افغانان تر خوږ ګوتو ونه نيسي او خپل شوم اهداف د فشار آلې په کارولو سره لاس ته رانه وړي!