کابل ټکی کام (شنبه، ۱۶ وری، ۱۴۰۴ل)
د ریاستالوزراء اقتصادي معاونيت د راپور له مخې، د اقتصادي معاونيت مرستیال ملا عبدالغني برادر اخوند په مشرۍ د اقتصادي کمېسیون له لوري په هرات ولایت کې د «بام هرات» تفریحي کمپلکس جوړولو طرحه تایید شوه.
د اقتصادي معاونيت په خبرپاڼه کې راغلي ، چې دې غونډې ته له اجنډا سره سم په هرات ولایت کې د خصوصي سکټور له لوري د «بام هرات» تفریحي کمپلکس جوړولو طرحه، پر اوسپنې ویلې کوونکو فابریکو باندې د دولتي داغمهجاتو د وېش او پلور، د بدخشان ولایت د وېکادور سرو زرو کان د قرارداد او همدا راز یوشمېر نور تعقیبي موضوعات د بحث لپاره وړاندې شول.
د کانونو او پټرولیم وزارت ته دنده سپارل شوې څو د وېکادور کان د استخراج او پروسس په اړه ترسره شوې داوطلبي بې پایلې اعلان کړي او نوې داوطلبي ترسره کړي او د نوې داوطلبۍ پر مهال دې وړ شرکت انتخاب کړل شي.
دغه راز په خبرپاڼې ويل شوي، چې په دغه غونډه کې له مفصل بحث وروسته په هرات ولایت کې د خصوصي سکټور له لوري د «بام هرات» تفریحي کمپلکس جوړولو طرحه تایید شوه.
اقتصادي معاونيت وايي، چې د دغه طرحې له مخې به خصوصي سکټور د یاد کمپلکس د جوړولو په موخه څه باندې یو میلیارد افغانۍ پانګونه کوي، چې شاوخوا څلورو زرو کسانو ته به د کار زمینه پکې برابره شي.
