کابل ټکی کام (يکشنبه، ۲۱ غویی، ۱۴۰۴ل)
د اقتصادي همکاریو پیاوړتیا، د ګډو پروژو پيل، پانګونې جلب او د سوداګریزو فرصتونو پراخولو په موخه د افغانستان، پاکستان او چين درېاړخیزه غونډه د افغانستان د صنعت او سوداګرۍ وزارت په کوربهتوب په کابل کې ترسره شوه.
په غونډه کې د پاکستان او چين لوړپوړو استازو، په ګډون د پاکستان ځانګړی استازی محمدصادق خان او د چين ځانګړی استازی یوشياو یونګ، ګډون کړی و.
د صنعت او سوداګرۍ وزارت خبرپاڼه کې راغلي چې د غونډې پر مهال ګډونوالو د ګډو صنعتي پارکونو جوړولو، د ځانګړو اقتصادي زونونو بنسټ اېښودو، د صادراتو لپاره د پروسس ګډو مرکزونو رامنځته کولو، درېاړخيزو سوداګريزو نندارتونونو د جوړولو، او د بانکي اړيکو د اسانتيا پر اړوندو موضوعاتو مفصل بحث وکړ. همداراز، د کوچنيو او منځنيو تصديو د ملاتړ مرکزونه هم د همکارۍ په اجنډا کې شامل وو.
د صنعت او سوداګرۍ وزارت سرپرست ښاغلي نورالدين عزيزي، د غونډې پر مهال د افغانستان اقتصادي تګلاره “اقتصادمحوره” وبلله او څرګنده يې کړه چې د بهرنۍ پانګونې د جذب لپاره مشخصې برنامې لري.
نوموړي د پاکستان او چين د سوداګرۍ وزيرانو ته رسمي بلنه ورکړه، تر څو د همکاریو د لا پراخېدو په موخه افغانستان ته سفر وکړي.
