کابل ټکی کام (يکشنبه، ۲۱ غویی، ۱۴۰۴ل)
د ریاستالوزراء اقتصادي مرستیال ملا عبدالغني برادر اخوند نن د ثور میاشتې په ۲۱مه د افغان انوېسټ خصوصي شرکت له استازو سره کتلي چې د اقتصادي معاونيت د معلوماتو له مخې د شرکت مسوولینو وويل چې د شبرغان – الوان دښتي برېښنا پروژه ۸۵ سلنه بشپړه شوې او د پلان له مخې به پر ټاکلي وخت پای ته ورسېږي.
د شرکت د معلوماتو له مخې، د دښت الوان سبسټېشن تخنیکي مطالعات بشپړ شوي او ساختماني چارې به يې ژر پیل شي.
د اقتصادي معاونيت په خبرپاڼه کې راغلي چې د تولک ولسوالۍ د سرب او جستو کان سروې بشپړه شوې او دا مهال اکتشافي کارونه روان دي، چې پکې له ۲۰۰ زیات هېوادوال بوخت دي زياتوي د کان د پروسس لپاره د یوې معیاري فابریکې ډیزاین هم پيل شوی، چې له بشپړېدو وروسته به یې د جوړونې چارې هم پیل شي.
د ریاستالوزراء اقتصادي مرستیال د شرکت د استازو له خوا شریکو شویو ستونزو ته د رسیدنې ژمنه کړې او ډاډ یې ورکړی چې د یادو پروژو د لا بریا لپاره به هر اړخیز ملاتړ کېږي.
