کابل ټکی کام (جمعه، ۲ غبرګولی، ۱۴۰۴ل)
د غزې تړانګې په شمال او د لبنان جنوبي سرحدي سیمو کې د مقاومتي ډلو د تازه بریدونو کې یو شمېر صهیونیستي پوځیان وژل شوي دي.
راپورونه وایي، چې د حماس او اسلامي جهاد ځواکونو له لوري غزه کې د اسرائیلي ځواکونو پر پوستو او قطارونو بریدونه ترسره شوي، چې له امله یې ګڼو پوځیانو ته مرګژوبله اوښتي ده.
په ورته مهال، د لبنان له خاورې د حزبالله اسلامي مقاومت ډلې هم د اشغالګرو پر ضد عملیات کړي، چې په پایله کې یې یو شمېر اسرائیلي پوځیان وژل شوي او ټپیان شوي دي.
د حزبالله له لوري په خپره شوې اعلامیه کې راغلي چې دوی د صهیونیستي پوځ د تحرکاتو پر وړاندې هدفمند بریدونه ترسره کړي او د دښمن ته یې درانه تلفات اړولي دي.
اسرائیلي رسنۍ هم تاییدوي چې د غزې په شمال او د لبنان په پوله وروستي بریدونه مرګژوبله لري؛ خو د دقیقو تلفاتو د شمېر له خپرولو یې ډډه کړې ده.
د یادونې وړ ده، چې د غزې جګړه له پیل راهیسې د حزبالله اسلامي غورځنګ ځواکونو هم د اسرائیلو پر وړاندې جګړه پیل کړې ده او درانه ځاني او مالي زیانونه یې ور اړولي دي.
