عبدالحمید جليلي
ښه راغلاست یوویشتمې پېړۍ ته… هغه پېړۍ چې انسانیت، عزت، غیرت، دین او شعور یې تر پښو لاندې کړي دي.
هغه چي باعزته او باایمانه انسان په خپل کور کې بنديوان دی،
لکه داسې چې تودې سکروټې یې د سوځېدلي لاس په موټي کې نيولي وي!
خو بېحيا، بېغيرته، چاپلوس بېشرمه انسانان د ټولنې محبوب او مقبول شخصیتونه بلل کېږي.
شپيته کلن سړی د ځوانۍ په شوقونو کې ډوب دی،
او شل کلن ځوان له ژونده ستړی شوی، د مرګ تمنا لري.
کوچنۍ نجونې د “محبوب له پرېښودو” سره د زړونو ماتيدو سندرې وايي.
غیرت، دین او حیا ته “توندفکري” او “بنيادګرايي” وايي،
خو بېلارې توب، فحاشي او بېحیایي ته وايي: کلتور، هنر، پرمختګ او روشنخيالي.
زنا عامه، هر ځای او اسانه شوې،
خو نکاح دومره ګرانه او پيچلې شوې چې خلک ترې تېښته کوي.
ماډرن توب او پرمختګ اوس دا معنا لري چې جامې وغورځوې!
که څوک شراب، سگريټ يا شيشه ونه څښي نو خلک یې وايي: “دا خو وروسته پاتې دی، حتی نارينه ورته هم نه ښکاري!”
هغه خاوند چې له خپلې مېرمنې سره خيانت کوي، هوښیار او چالاک ګڼل کېږي،
خو څوک چې د نکاح وفاداري وساتي، ورته وايي: عقب مانده دي.
تشنابونه اوس د سیلفیو استودیوګانې شوې،
او مسجدونه د “عاشقانو د لیدو ځایونه.”
دین اوس دومره تحریف شوی چې حرام ته د حلال نوم ورکول کېږي،
او باطل ته د حق جامه ور اغوستل کېږي.
که څوک د ظلم پر خلاف د قرآن آیت وايي : “فتنه اچوونکو او تخريب ګڼل کېږي
خو که څوک د ظالم ستاینه د دین په نامه وکړي، ورته وايي: “ښه عالم دی او سوله غواړي!”
هغه دیني اصطلاحات چې د الله د رضا لپاره وو، اوس د سیاسي ګټو او شخصي شهرت لپاره کارېږي.
قرآن د هوس غوښتونکو د توجیه وسیله ګرځېدلی،
او شریعت د زورواکو د ظلم توجیه!
شخصي سليقو ته محمدي شريعت نوم ورکړ شوي
او انسانانو ته د تقدس سجدي کيږي
رښتيا خيانت او تخريب بلل کیږي او درواغو ته بيا نيک مصلحت وايي..
امبولانس که ناوخته راشي، پروا نشته،
خو که پيزا يا برګر ناوخته شي، خلک غصه کېږي!
که څوک ستا عیب در وښيي، هغه ته وايي: “حاسد، تخریبکار او منفي ګرا”
خو که څوک دې درواغو تعریفونه او چاپړوسي وکړي، هغه ته وايي: “صادق او مخلص!”
پيسې له رشتو ډېرې ارزښتمنې شوې،
که حرامې هم وي، خو “کار جوړوي.”
دین ته خلک د خدای د رضا لپاره نه، بلکې د خلکو د خوښۍاو شهرت لاسته راوړنې لپاره ارزښت ورکوي
مسجدونه د الله کور نه، بلکې د خود نمايۍ او ځان منلو سټيجونه او ميدانونه ګرځيدلي
زلميان له نکاح ډاريږي،
خو ګناه ته هر وخت اماده دي.
ظلم عادي شوی،
غیرت او عزت لکه نايابه خزانه ګڼل کېږي.
🛑 دا هغه زمانه ده چې:
✅ اخلاق پکې مړه شوي،
✅ دین پکې خالي پوستکی شوی،
✅ تربیه پکې فاسده شوې،
✅ روغتیا پکې تباه شوې،
✅ او ټولنه پکې اخلاقي او ارزښتونو سقوط ته روانه ده.
🌐 دا يوويشتمه پېړۍ ده…
دا هغه پېړۍ ده چې حق ته باطل، او باطل ته حق ويل کېږي.
دا هغه زمانه چې مذهبي او غير مذهبي سرچپه مزل کوي
دا هغه زمانه ده چې هر څه پکې واوښتل او سرچپه دي!
دا هغه زمانه ده چې شعور مسخ شوي او ارزښتونه سرچپه شوې
ښه راغلاست يوويشتمي پيړي ته!!!
