(کابل ټکی کام، چهارشنبه، ۱۸ چنګاښ ۱۴۰۴):
د یمن وسلهوالو ځواکونو په یوه تازه بیان کې ویلي چې د فلسطین د مظلوم ولس ملاتړ لپاره یې د «ETERNITY C» په نوم بېړۍ په نښه کړې ده. د يمن د پوځ وياند يحی سريع په يوه تازه بيان کې ويلي، چې دغه بېړۍ د یوه بې پیلوټه چاودیدونکي کښتۍ (زورق مسيّر)، شپږو لېږدېدونکو (کروز) توغندیو او بالیستیک توغندیو په وسیله ویشتل شوې چې په خبره يې په پایله کې په بشپړ ډول ډوبه شوې ده. زياتوي بېړۍ د اشغال شوي فلسطین خاورې «ام الرشراش» بندر ته روانه وه.
د یمني پوځ په وینا، تر عملیاتو وروسته د دوی سمندري ځانګړو ځواکونو د بېړۍ د عملې څو غړي ژغورلي او هغوی ته يې روغتيايي مرسته برابره کړې ده.
يحيی سريع ويلي، نیول شوي عمله امن ځای ته انتقال کړل شوې ده او په وينا يې دا اقدام له څو ځله خبرداریو وروسته وشو، ځکه بېړۍ د یمن د سمندري ځواکونو خبرداري له پامه غورځولي وو.
په بیان کې یو ځل بیا ټولو شرکتونو او هېوادونو ته خبرداری ورکړل شوی چې د صهیوني رژیم سره هر ډول تجارتي اړیکې پرې کړي، که نه نو بېړۍ او عمله به یې هر ځای هدف ګرځي.
یمني پوځ ټینګار کړی چې د فلسطین د محاصرې د ختمېدو او د غزې د مظلومو خلکو د ملاتړ لپاره به عملیات دوام ولري.
